Беларусы заплацяць $10 млн за правядзенне парламенцкіх выбараў

Мінулыя прэзідэнцкія каштавалі 15 млн даляраў, мінулыя парламенцкія — 11 млн даляраў, падлічыла Радыё Свабода.

Згодна з пастановай Саўміну ад 1 чэрвеня, фінансаванне парламенцкіх выбараў у Беларусі пройдзе згодна з бюджэтам Беларусі на 2016 год. У бюджэце прадугледжана, што на выбары выдаткоўваецца 20 062 026 дэнамінаваных беларускіх рублёў і 50 капеек. Па курсе на момант публікацыі гэта прыблізна 10 млн даляраў.

На прэзідэнцкія выбары ў 2015 годзе было прадугледжана 263,9 млрд недэнамінаваных рублёў альбо 15,3 млн даляраў. На парламенцкія выбары 2012 года — 94,4 млрд рублёў альбо 11,1 млрд даляраў. На прэзідэнцкія выбары-2010 — 26,1 млрд рублёў альбо 8,6 млн даляраў.

Траціць абсалютна ўсе прадугледжаныя грошы неабавязкова, нескарыстаныя сродкі вяртаюцца ў бюджэт.

Выдаткі на сёлетнія выбары складаюць 0,2% ад усіх выдаткаў на агульнадзяржаўную дзейнасць. Амаль столькі ж выдаецца на дзяржаўныя органы, што забяспечваюць дзейнасць прэзідэнта, ці на апарат міждзяржаўнай інтэграцыі. На дашкольную адукацыю ці на сацыяльную абарону выдаецца ў 4,5 раз меней, на моладзевую палітыку ці на кінематограф — у 3 разы меней.