Някляеў заклікаў дэлегатаў Усебеларускага сходу адкласці парламенцкія выбары

Не трэба ўтойваць, народ нічога ў нас не вырашае. Вырашаюць за яго. І калі нешта ў нашай краіне трэба перайначыць у першую чаргу, дык менавіта гэта. Вярнуць народу права выбару, без чаго ні з палітычнага, ні з эканамічнана тупіку нам не выйсці", - напісаў у звароце да дэлегатаў старшыня Рады руху “За дзяржаўнасць і незалежнасць!” у сваім Фэйсбуку.

Права выбару мусіць быць забяспечана неадкладна: на бліжэйшых выбарах у парламент, перакананы Уладзімір Някляеў, які лічыць, што дэлегаты Усебеларускага сходу могуць тут сказаць сваё важкае слова.

"Парламенцкія выбары, прызначаныя на 11 верасня, трэба адкласці. Іх нельга праводзіць так, як плануе ўлада. А плануе яна не парламенцкія выбары, а парламенцкія прызначэнні. Як было яно і на мінулых “выбарах”, і на пазамінулых, калі ў парламент прызначаліся цалкам залежныя ад улады людзі, якія нічога не вырашалі", - напісаў Някляеў.

Выйсце палітык бачыць у фрмаванні дэпутацкага корпусу, здольнага ўзяць на сябе адказнасць за будучыню Беларусі. На яго думку, найперш у краіне павінны быць створаныя такія ўмовы, каб у парламент, а гэта значыць у палітыку пайшлі разумныя, дасведчаныя, адказныя людзі, якія сёння палітыкі цураюцца.

"Што б я зрабіў, калі ўявіць, што ў нейкім лесе здох нейкі воўк - і я стаў дэлегатам усебеларускага сходу? Я б скарыстаўся гэтым, каб прапанаваць адкласці парламенцкія выбары, бо краіна да іх не гатова, склікаць пазачарговую сесію Палаты прадстаўнікоў Нацыянальнага сходу і ўнесці ў выбарчае заканадаўства змены, якія б гарантавалі правядзенне выбараў свабодных і справядлівых. Гэта рэальны крок да сапраўднага, а не цацачнага парламента, да жыццёва неабходных палітычных і эканамічных рэформаў. Гэта шлях да захавання Беларусі, яе дзяржаўнасці і незалежнасці. Гэта гістарычны шанец - і я б на вашым месцы яго не ўпусціў", - падсумаваў Уладзімір Някляеў.