Еўразвяз можа павялічыць фінансавую падтрымку Мінску

У тым ліку на выпадак патэнцыйнага пагаршэння эканамічнай сітуацыі ў Расіі, эканамічных адносінаў з ёй, альбо агрэсіі з яе боку, мяркуюць эксперты.

Паводле словаў палітолага Юрыя Чавусава, большасць грошай з Еўразвязу атрымаюць менавіта дзяржаўныя структуры пад канкрэтныя праекты:

– Абвешчана, што ў два разы павялічыцца аб’ём дапамогі з боку Еўразвязу для Беларусі. Напэўна, гэтае павелічэнне адбудзецца за кошт тых сродкаў, якія наўпрост ідуць дзяржаве. Я маю на ўвазе, што яна не пойдзе прыдзяржаўным і псеўдаграмадскім арганізацыям. Менавіта дзяржаўным органам пад дзяржаўныя інфраструктурныя праекты, кшталту абсталявання мяжы ці праектаў, звязаных з экалогіяй. Паглядзім, якой будзе рэакцыя сапраўднай грамадзянскай супольнасці на гэтую новую сітуацыю. Я тут, хучэй, аптыміст.

Кожны год Беларусь атрымлівае ад буйных еўрапейскіх донараў каля 60-ці мільёнаў еўра, і большасць з гэтых грошай, паводле падлікаў экспертаў, нават 80-90 працэнтаў атрымлівае дзяржава. Астатнія сродкі накіраваны на развіццё грамадзянскай супольнасці. Галоўныя донары Беларусі – гэта інстытуты Еўразвязу, Нямеччына, Польшча, Швецыя і Злучаныя Штаты, паведамляе "Радыё Рацыя".