Еўрасаюз усё яшчэ спадзяецца на дыялог з Беларуссю

Адказ на ліст, які падпісалі беларускія апазіцыйныя палітыкі Мікалай Статкевіч, Уладзімір Някляеў, Сяргей Калякін, Анатоль Лябедзька і Павел Севярынец, напісалі старшыня Еўрапейскага савета Дональд Туск, кіраўнік Еўракамісіі Жан-Клод Юнкер і вярхоўная прадстаўніца ЕС па знешняй палітыцы і палітыцы бяспекі Федэрыка Магерыні.

"Існаванне моцнай апазіцыі – гэта жыццёвая неабходнасць для развіцця дэмакратычных і плюралістычных грамадстваў. Выбарчае заканадаўства і працэдуры, якія адпавядаюць міжнародным стандартам, гэта, безумоўна, вельмі важна для гарантавання грамадзянам магчымасці рэальнага выбару.

Фінальная справаздача АБСЕ БДІПЧ аб правядзенні беларускіх прэзідэнцкіх выбараў павінна быць завершана да канца бягучага году. ЕС будзе ўдзяляць асобую ўвагу гэтым рэкамендацыям і настойліва заклікаць, каб беларускія ўлады іх выконвалі", - прыводзіць цытату з ліста прэс-служба Аб'яднанай грамадзянскай партыі.

Таксама ў пасланні зроблены акцэнт на неабходнасці налажвання дыялога паміж Бруселем і Мінскам:

"ЕС ангажаваны ва ўсебаковыя дачыненні для паляпшэння Еўрапейска-беларускіх стасункаў. ЕС спадзяецца на больш пазітыўны парадак дня з Беларуссю, павелічэнне кантактаў і сфер для супрацы. Мы ўпэўненыя, што пашырэнне дыялогу – гэта ключ для далейшага прагрэсу ў нашых стасунках. Правы чалавека, дэмакратыя, верхавенства права і свабода выказванняў – гэта частка раўнання, унутраная частка заангажаванасці ў ЕС. Далучэнне і актыўнае ўцягванне ў гэтыя працэсы грамадзянскай супольнасці застанецца найважнейшым для развіцця такіх адносін".
Лідар АГП Анатоль Лябедзька станоўча ацаніў факт ліста і лічыць, што агульныя з ЕС погляды адносна свабодных сумленных выбараў змогуць прывесці да пераменаў у Беларусі.