Павел Вусаў: Перамогі і інаўгурацыя Лукашэнкі сталі руцінай

Аляксандар Лукашэнка разам з малодшым сынам Мікалаем у чэрвені 2014 года лётаў на інаўгурацыю прэзідэнта Украіны Пятра Парашэнкі. Візіту ў адказ не здарылася.
Пра тое, як палітолаг Павел Вусаў тлумачыць адсутнасць Пятра Парашэнкі на інаўгурацыі, піша Радыё Свабода.

"Відаць, гэта не вельмі важная падзея ў гісторыі Беларусі. І, фактычна, высокія прадстаўнікі іншых дзяржаў не патрэбныя. Усе чакалі, што вынік выбараў будзе менавіта такі, які ён і атрымаўся.

Калі казаць пра Пятра Парашэнку, выбары ва Украіне і візіт туды Аляксандра Лукашэнкі на інаўгурацыю, то гэта было важна як для Украіны, так і для Лукашэнкі. Яму было важна паехаць ва Украіну і засведчыць, што ён прытрымліваецца сваёй уласнай палітыкі ў дачыненні да Украіны, а не з'яўляецца на ўсё згодным хаўруснікам Пуціна.

Што тычыцца Беларусі, то перамогі і інаўгурацыі Лукашэнкі сталі рутынай. Як для саміх беларусаў, так і для замежнікаў. Усе звыкліся, што Лукашэнка — прэзідэнт пажыццёва. Таму прысутнасць палітыкаў з суседніх краін не важная — ні для Беларусі, ні для іншых краін, ні для асабіста Лукашэнкі".