Мікола Статкевіч: З Беларусі – не з'еду (фота, відэа)

Акции / Фото

Экс-кандыдата ў прэзідэнты-2010 Міколу Статкевіча, вызваленага ўчора з-за кратаў, сустракала позна ўвечары 22 жніўня на Ўсходнім аўтавакзале ў Менску некалькі соцень чалавек.

Нагадаем, 22 жніўня Аляксандр Лукашэнка «зыходзячы з прынцыпаў гуманізму», прыняў рашэнне вызваліць Міколу Статкевіча, Міколу Дзядка, Ігара Аліневіча, Яўгена Васьковіча, Арцёма Пракапенку і Юрыя Рубцова.

Людзі віталі вызваленага палітыка воплескамі, увесь час гучала: «Жыве Беларусь!», «Дзякуй!» і «Герой!».

Выглядае палітык бадзёрым, з выдатным настроем і незламаным. «Я і далей буду працягваць тое, што рабіў. Працаваць для вольнай, нармальнай, беларускай Беларусі. Але ў бліжэйшыя некалькі дзён, напэўна, я б хацеў проста пабачыць сваіх родных і блізкіх, пабыць трошкі з імі... Тыдзень лета застаўся!», - сказаў Мікола Статкевіч.

Але, паводле палітыка, «разам з тым я буду сустракацца з прадстаўнікамі апазіцыйных арганізацый, будзем абмяркоўваць, што рабіць, таму што няма ніякай, больш-менш прымальнай стратэгіі».

Мікола Статкевіч дадаў, што ў яго быў варыянт дзеянняў, нават праграмы, але «пакуль я быў там» - улада вызваленнем палітвязняў скасавала гэты варыянт: «Я там здолеў бы зрабіць гэтыя выбары нелігітымнымі, а зараз... не ведаю».

На пытанне з натоўпу пра стан здароўя Статкевіч выгукнуў: «Не дачакаецца! Выдатна!».

«Я пастаянна адчуваў падтрымку, я не адчуваў сябе ў роспачы, у дэпрэсіі, я адчуваў сябе ў працэсе, адчуваў, што нешта раблю для Беларусі самім фактам знаходжання там. Вот цяпер трэба думаць, як па-новаму дапамагаць», - сказаў Статкевіч.

Паводле экс-кандыдата на прэзідэнта, ён не застаецца ў палітыцы, а застаецца ў тым, што «назваў бы проста барацьбой за нармальную краіну»: «Я буду яе працягваць. Ніколі не спыняўся за гэтыя гады. Думаю, засталося не вельмі шмат, каб зрабіць Беларусь вольнай».

Што да прычын вызвалення, то, мяркуе Мікола Статкевіч, «у дыктатуры скончыліся грошы і яна будзе імітаваць дэмакратыю».

Сітуацыю, у якую патрапіла апазіцыя з выбарамі прэзідэнта, Мікола Статкевіч называе патавай: «У гэтай сітуацыі апазіцыя зрабіла сабе пастку. І я не ведаю, што трэба рабіць, калі байкот не з'яўляецца маральным, бо гэта байкот слабакоў, якія не сабралі подпісы. Байкот можа прывесьці да таго, што будуць лічыць галасы, але і кандыдата апазіцыйнага падтрымліваць нельга, бо можа здарыцца так, што ўсе альтэрнатыўныя кандыдаты прызнаюць выбары сумленнымі».

Мікола Статкевіч дадаў, што ўсе гады зняволення адчуваў жаданне ўлады, каб ён эміграваў з краіны. Як іранічна заўважыў палітык, адміністрацыя турмы нават цешылася, што ён пачаў вывучаць англійскую мову на завочных курсах. Але пакідаць Беларусь, падкрэсліў Мікола Статкевіч, ён не будзе ні пры якіх умовах.