Больш за 100 тысяч подпісаў ужо сабралі за Лукашэнку

Ініцыятыўная група Аляксандра Лукашэнкі ўжо здала больш за 100 тысяч подпісаў у тэрытарыяльныя камісіі. Пра гэта паведаміла кіраўнік ЦВК Беларусі Лідзія Ярмошына. Па яе словах, подпісы здалі пакуль толькі 2 ініцыятыўныя групы. 

Нагадаем, збор подпісаў працягнецца да 21 жніўня. Сяргей Гайдукевіч ужо сабраў 55 тысяч подпісаў, Віктар Цярэшчанка — 22 тысячы подпісаў, Таццяна Караткевіч — 15 тысяч, Сяргей Калякін больш за 6 тысяч. Ініцыятыўная група Анатоля Лябедзькі сабрала 15 тысяч подпісаў. У групе кажуць, што яны спадзяваліся на 22-23 тысячы. “Казацкі атаман” Мікалай Улаховіч не прызнаўся, колькі подпісаў сабраў, паведамляе Еўрарадыё.

Лідзія Ярмошына таксама паведаміла, што ўжо маюць акрэдытацыю 188 тысяч нацыянальных назіральнікаў. Назіральнікі ад 8 партый і грамадскіх аб’яднанняў працуюць у ЦВК.

У суды паступіла 8 скаргаў на фармаванне тэрытарыяльных камісій. Тры скаргі пакінулі без разгляду з-за парушэння парадку падачы.