Чаму кіраўнік МВД Беларусі апрануў на парад Перамогі форму камісара НКУС?

Личности

Міністр унутраных спраў Ігар Шуневіч у сераду, 13 траўня, ў Палаце прадстаўнікоў пракаментаваў журналістам сваё з'яўленне 9 траўня на парадзе Перамогі ў Мінску ў дзіўным абмундзіраванні, паведамляе "Еўрарадыё".

Ён стаяў каля Аляксандра Лукашэнкі ў форме камісара рабоча-сялянскай міліцыі НКУС СССР узору 1943 года (у цёмна-сіняй гімнасцёрцы з жорсткім каўнерыкам, партупеі, галіфэ з бірузовымі лампасамі, запраўленымі ў боты, і сіняй фуражцы з бірузовым аколышам).

Ігар Шуневіч сказаў, што не хацеў бы дадаткова тлумачыць "відавочнае". Але адзначыў:

"У гэтай форме мае папярэднікі, супрацоўнікі органаў унутраных спраў абаранялі Радзіму, паміралі, гінулі, здзяйснялі подзвігі. Гэта даніна павагі да іх, не больш".

На здымку: Шуневіч - злева. Фота Віталя Дэмбоўскага

Нагадаем, сёння міністр унутраных спраў прадстаўляў у Палаце прадстаўнікоў законапраект аб амністыі. Ён быў прыняты ў двух чытаннях.