24 снежня адбудзецца сустрэча кантактнай групы па Украіне ў Мінску

У адпаведнасці з рашэннем групы паседжанне адбудзецца ў зачыненым для прэсы рэжыме, паведаміў "Радыё Свабода" прэсавы сакратар беларускага МЗС Дзмітрый Мірончык.

Міністар замежных спраў Украіны Павел Клімкін таксама паведаміў, што пасяджэнне трохбаковай кантактнай групы па Украіне плануецца правесці ў сераду ў Мінску.

"Мы плануем заўтра такое паседжанне. Пакуль перамовы вядуцца, і мы не ведаем, ці дастаткова нам аднаго пасяджэння", - сказаў ён журналістам у ў Кіеве ў аўторак.

Пра правядзенне трохбаковай кантактнай сустрэчы ў фармаце Украіна-Расея-АБСЭ дамовіліся падчас тэлефоннай размовы ў панядзелак прэзыдэнты Украіны Пятро Парашэнка, Францыі - Франсуа Аланд, Расеі - Уладзімір Пуцін і канцлер Нямеччыны Ангела Меркель, паведаміла раней прэсавая служба ўкраінскага прэзыдэнта.

Паводле паведамлення, суразмоўцы "пагадзіліся з неабходнасцю выконваць усе пункты мінскіх дамоўленасцей, сярод якіх пытанні спынення агню, выхаду на лінію разьмежавання, якая замацаваная ў Мемарандуме ад 19 верасня, адводу войскаў і цяжкага ўзбраення, а таксама найхутчэйшага вызвалення ўсіх закладнікаў".

Пятро Парашэнка заявіў аб неабходнасці вызвалення з расійскай турмы ўкраінскай лётчыцы Надзеі Саўчанка.

Лідары чатырох краін дамовіліся "працягнуць тэлефонныя кансультацыі праз некалькі дзён".

Сустрэча кантактнай групы па Данбасе (Украіна, Расея, АБСЭ з удзелам сэпаратыстаў з Данецка і Луганска) пераносілася ўжо некалькі разоў.