Сын Аляксандра Алесіна: Супрацоўнікі КДБ сказалі пачакаць да панядзелка

"Сёння яшчэ не прайшло 10 дзён ад затрымання, але так, на гэтым тыдні мусіць быць 10 дзён, і бацьку альбо мусяць выставіць абвінавачванне, альбо вызваліць яго. Калі гэта вызначыцца, дакладна ня ведаем. У КДБ нам сказалі, што ў другой палове дня 8 снежня нешта стане вядома", -  паведаміў Рыгор Алесін "Радыё Свабода".

Ці прызначылі Аляксандру Алесіну адваката?

Паводле ранейшых звестак, журналісту дапамагаў дзяжурны, то бок дзяржаўны адвакат. Рыгор Алесін паведаміў пра сітуацыю з адвакатам:

"У нас ёсць планы наконт адваката, нам прапанавалі чалавека, але зноў нагадаю, што была размова з супрацоўнікамі КДБ, і тыя сказалі, каб мы пачакалі да панядзелка. Таму мы і вырашылі, што калі б было ўсё гэтак сур’ёзна, дык трэба было б весці да яго незалежнага адваката. Магчыма, усё ж і ня будзе ніякага абвінавачання, і яго выпусцяць? Таму мы вельмі разлічваем на другую палову дня".

У КДБ сітуацыю з Аляксандрам Алесіным па-ранейшаму не каментуюць.

Звесткі пра затрыманне Аляксандра Алесіна паводле падазрэнняў у здрадзе радзіме і шпіянажы з'явіліся ў канцы мінулага тыдня. Гэтыя звесткі пакуль пацвердзілі толькі сваякі журналіста і праваабаронцы.