У Берасці сустракаюцца віцэ-прэм’еры Польшчы і Беларусі

У Брэсце праходзіць апошні дзень XVIII Беларуска-польскага эканамічнага форуму "Добрасуседства 2014”. Сёння у рамках двухдзённага мерапрыемства сустракаюцца намеснікі прэм'ер-міністраў Беларусі іПольшчы. Міхал Русы і Януш Пехаціньскі будуць размаўляць з удзельнікамі форуму і прадстаўнікамі бізнэсу, паведамляе Беларуская рэдакцыя Польскага радыё.

Беларускія дзяржаўныя СМІ асвятляюць сёлетні форум "Добрасуседства” у якасці нарады прадстаўнікоў дзвюх арганізацый - Еўрапейскага саюза і Еўразійскага эканамічнага саюза, у склад якога ўваходзяць Беларусь, Расія й Казахстан.

Вячаслаў Рэўт - віцэ-старшыня Беларускай гандлёва-прамысловай палаты сказаў, што Польшча і Беларусь, гэта "вароты ў абодва саюзы”.

- Паказчыкі нашай сумеснай працы па выніках сямі месяцаў гэтага года значна вышэй паказчыкаў мінулага года. Мы будзем імкнуцца да таго, каб да канца года тавараабарот склаўся на ўзроўні 3 млрд долараў. Гэта складаная задача, але мы разлічваем, што нам удасца яе выканаць. Усе перадумовы для гэтага ёсць, - сказаў Рэўт.

Падчас першага дня XVIII Польска-беларускага эканамічнага форуму "Добрасуседства-2014” у Брэсце абмяркоўваліся пытанні датычныя польска-беларускага памежнага супрацоўніцтва ў банкаўскай і энэргетычнай галіне.