За кіно ў пераходзе арганізатараў пасадзілі на 5 i 6 сутак

19 верасня ў Маскоўскім судзе Мінска адбыўся суд на арганізатарамі культурніцкага мерапрыемства "Кіно ў пераходзе", піша "Наша Ніва".

Яны што кепскае рабілі? Кралі, ламалі? Пляваліся, мацюкаліся? Не, проста хацелі зладзіць незвычайнае культурнае мерапрыемства. Юнакі цягнуцца да культуры.

Настасся Доль і Зміцер Латушкін былі асуджаныя па артыкулах 17.1 і 23.4 - "нецэнзурная лаянка" і "непадпарадкаванне супрацоўнікам міліцыі". 

Паводле выраку суддзі Таццяны Мотыль Настасся атрымала 6 сутак, Зміцер - 5. 

"Нам поступила информация о проведении шествия или митинга в подземном переходе", - сведчыў у судзе мінскі спецназавец.

Сведкі, якія знаходзіліся за дзвярыма залы суда, паведамілі, што ў перапынку на азнаямленне з матэрыяламі справы Змітра адвялі ў кабінет суддзі і, верагодна, асудзілі ў гэты момант, без удзелу адваката і сведак. 

Падтрымаць асужданых прыйшло каля 15 чалавек. 

Нагадаем, што 18 верасня міліцыя затрымала каля 30 ўдзельнікаў мерапрыемства ў пераходзе каля журфака БДУ. Пазней усіх, акрамя агранізатараў, адпусцілі.

Тыдзень таму каля 25 чалавек былі затрыманыя падчас аналагічнага кінапрагляду ў парку Горкага.