Партыя БНФ так і не знайшла памяшкання для з'езду - адмовілі ўладальнікі 50 залаў

З'езд Партыі БНФ мусіў прайсці ў Мінску 13 верасня, аднак уладальнікі 50 залаў, да якіх звярталіся фронтаўцы, адмовілі, спасылаючыся на розныя прычыны, паведамляе Еўрарадыё.

Варта адзначыць, што пошукі працягваліся ад ліпеня. Вось што распавёў Еўрарадыё старшыня Партыі БНФ Аляксей Янукевіч:

"У такой сітуацыі Сойм Партыі БНФ прыняў рашэнне правесці з'езд 11 кастрычніка... Уся гэтая сітуацыя, безумоўна, вельмі прыкрая і яна не толькі і не столькі характарызуе стаўленне сённяшніх уладаў да Партыі БНФ (і, як бачым, яно негатыўнае), а характарызуе і ілюструе вельмі яскрава тую атмасферу, якая пануе ў краіне".

Паводле словаў Янукевіча, падобных выпадкаў, каб яго партыя не магла знайсці памяшканне для з'езда, яшчэ не было (праўда, у 2003-м яго праводзілі пад Мінскам). Паколькі з'езд справаздачна-выбарчы, правесці яго ў мінскім офісе немагчыма - вылучана каля 200 дэлегатаў. Таму на працягу бліжэйшага месяца будуць працягвацца пошукі памяшкання.

Вядома, што на з'ездзе абмяркуюць тактыку і стратэгію Партыі БНФ на прэзідэнцкія выбары.