Пасол Эстоніі пакідае Беларусь. Афіцыйны Мінск ім задаволены, апазіцыя - расчараваная

На развітанне спадара Ленсмэнта прынялі намесніца міністра замежных спраў Алена Купчына і міністар Уладзімер Макей. Спецыялісты ў міжнародных справах адразу звярнулі на гэта ўвагу. Рэдка бывае, каб з паслом, які пакідае краіну, да таго ж які прадстаўляў у Беларусі краіну, што ўваходзіць у НАТО, з павагай развіталіся і намеснік міністра і сам міністр. Гэта прызнанне таго, што праца спадара Ленсмэнта ў Беларусі была, на думку афіцыйных уладаў, плённай, піша Радыё Свабода.

А вось у апазіцыі пра былога пасла Эстоніі іншае ўражанне. Старшыня Аб’яднанай грамадзянскай партыі Анатоль Лябедзька кажа:

"Гады тры-чатыры таму ў Беларусі працавала вельмі моцная і прафесійная каманда паслоў. Менавіта каманда! Рэгулярна, звычайна па аўторках, праводзіліся сустрэчы дыпламатаў з прадстаўнікамі апазіцыі. На іх выпрацоўваліся калегіяльныя рашэнні. На акцыях апазіцыі раней можна было бачыць картэж дыпламатычных аўтамабіляў з дзяржаўнымі сцяжкамі.

І гэта стала праблемай для ўлады. Яна зрабіла ўсе, каб выціснуць гэтых дыпламатаў з Беларусі. Каго праз скандалы, каго нейкім іншым чынам. Фактычна за мяжу пайшло пасланне, каго беларускі бок хацеў бы бачыць у Беларусі. Гэта павінны быць нейкія гандлёвыя прадстаўнікі, напрыклад, Вэнспілсу, Клайпеды... Яны не павінны займацца пытаннямі правоў чалавека, свабодаў, а павінныя рэгулярна хадзіць у адміністрацыю прэзідэнта альбо МЗС і ў лепшым выпадку рабіць нешта ў сферы эканомікі.

Амбасадар Эстоніі з гэтай кагорты. Ён, хутчэй, не прадстаўнік краіны Эстонія, а прадстаўнік нейкіх гандлёвых структур. Спадар амбасадар Эстоніі - гэта той від дыпламта, якога і хоча бачыць у Беларусі афіцыйны Мінск".

Новы пасол Эстоніі ў Беларусі ўжо прызначаны. Гэта Маіт Мартынсон. Ён нарадзіўся ў 1969 годзе. Скончыў эканамічны факультэт Маскоўскага дзяржаўнага ўнівэрсітэту. Працаваў у апараце МЗС, быў першым сакратаром у пасольстве Эстоніі ў ЗША, а таксама займаў пасады пасла ў Кітаі ды Ірландыі. Ірландыя і была апошнім месцам яго працы, пачынаючы з 2010 году.