Сікорскі падтрымлівае ўвядзенне чарговых санкцый супраць Расіі

“Расія нясе адказнасць за катастрофу малазійскага самалёта над Украінай” - цытуе міністра замежных справаў Польшчы Радаслава Сікорскага Беларуская рэдакцыя Польскага радыё.

На прэс-канферэнцыі пасля сустрэчы з брытанскімі міністрамі замежных справаў і абароны Сікорскі сказаў, што неабходна ўвесці чарговыя санкцыі супраць Расіі.

- За гэтую трагедыю адказваюць тыя, хто пастаўляў і на жаль працягвае пастаўляць зброю так званым сепаратыстам. Гэта Расія. Сярод камандзіраў сепаратыстаў - грамадзяне Расіі. Мы лічым, што тэрытарыяльная цэласнасць Украіны павінна быць адноўленая, - падкрэсліў палітык.

Міністр абароны Польшчы Томаш Сямоняк, які ўдзельнічаў у сустрэчы, сказаў, што Велікабрытанія плянуе правесці ваенныя вучэнні ў Польшчы.