Для ЕС беларускае пытанне цяпер не ў прыярытэце

Міністр замежных спраў Беларусі Уладзімір Макей ў інтэрв'ю праграме «Галоўны эфір» заявіў: “Нават калі б мы вызвалілі тых, каго яны называюць палітвязнямі, то нам заўтра будуць выстаўленыя новыя прэтэнзіі. Напрыклад, чаму ў Беларусі не рэгіструюцца аднаполыя шлюбы. Да нас бы выказалі прэтэнзіі, што дзеці называюць бацькоў «мама» і «тата», а не так, як патрабуецца там - «бацькі №1 і №2»… І гэдак далей”. Палітолаг Валер Карбалевіч нагадвае, што падобныя заявы – традыцыйны для беларускіх уладаў прапагандысцкі прыём для "замыльвання" каштоўнасцяў ЕС у вачах беларускіх грамадзян.  ,

– Міністр замежных спраў Беларусі павінен добра ведаць умовы нармалізацыі дачыненняў з Еўропай. Адна з галоўных – вызваленне палітвязняў, пасля чаго і можа распачацца размова. Таму заяву Макея, на мой погляд, трэба разглядаць з двух бакоў. Першы – гэта такі прапагандысцкі прыём, якія неаднаразова выкарыстоўваецца беларускай прапагандай, калі заходнія каштоўнасці і мадэль жыцця праецыру.цца толькі на існаванне ў Еўропе сэксуальных меншасцяў. Другі момант – Менск падае сігнал Захаду, што Беларусь чакае нейкіх канкрэтных крокаў ад Еўропы ў адказ на вызваленне Бяляцкага. Маўляў, мы пайшлі вам насустрач – пакажыце і свае дзеянні, – пракаментаваў словы кіраўніка беларускага знешнепалітычнага ведамства для Беларускага Радыё Рацыя палітолаг Валер Карбалевіч.

На яго думку,  ліквідацыя эканамічных санкцый супраць некаторых беларускіх алігархаў была б для афіцыйнага Мінска прыемным крокам і знакам, што Захад гатовы пачаць чарговы дыялог. Але хуткай рэакцыі можа і не быць, бо ў "Еўрасаюзе "беларускае пытанне” знаходзіцца не на першым плане. У прыярытэце – украінскі крызіс, а таму на розныя сігналы з боку Беларусі там могуць проста не звернуць увагі".