Партыя БНФ патрабуе вызвалення Змітра Каспяровіча

16 ліпеня ў цягніку “Мінск – Вільнюс” быў затрыманы, а пасля змешчаны пад адміністратыўны арышт сябра Партыі БНФ, былы кандыдат у дэпутаты палаты прадстаўнікоў ад Партыі БНФ Зміцер Каспяровіч. Афіцыйнай падставай для затрымання і зняволення сталася нібыта не адбытае да канца адміністрацыйнае спагнанне, да якога Каспяровіч быў прысуджаны яшчэ напярэдадні Дня волі ў сакавіку 2008 года.

Партыя БНФ рашуча пратэстуе супраць арышту свайго сябра, бо лічыць яго абсалютна неправамерным нават з пункту гледжання сучаснага беларускага заканадаўства, гаворыцца ў заяве партыі.

Згодна з артыкулам 13.6. Працэсуальна-выканаўчага кодэксам аб адміністратыўных правапарушэннях (у рэдакцыі што дзейнічала на момант правапарушэння і да 28 снежня 2009 года), не падлягае выкананню пастанова аб накладанні адміністратыўнага спагнання, калі яна не было прыведзеная ў выкананне на працягу трох месяцаў з дня ўступлення пастановы ў законную сілу. Менавіта гэтая норма дзейнічала у час арышта Каспяровіча ў 2008 годзе і на яе падставе тэрмін выканання адміністратыўнанага арышту Каспяровіча даўно скончаны. Выкарыстанне ў дачыненні да справы Каспяровіча артыкула 13.6 Працэсуальна-выканаўчага кодэкса аб адміністратыўных правапарушэннях у рэдакцыі, што была ўведзеная 28 снежня 2009 года і дзейнічае цяпер, ёсць незаконным і супрацьпраўным прыкладам зваротнага выкарыстання нормаў заканадаўства.

"Мы разглядаем гэты супрацьзаконны выпадак як помсту ўладаў Змітру за яго актыўную грамадзянскую і палітычную пазіцыю, у тым ліку праяўленую і падчас г. зв. “выбараў” у Палату прадстаўнікоў у 2012 г., а таксама як спробу запалохаць усё палітычна актыўнае беларускае грамадства. Асаблівага цынізму дзеянням уладаў дадае той факт, што сучасны стан здароўя Каспяровіча патрабуе сталага нагляду ўрачоў і лекавання адмысловымі медпрэпаратамі, што ва ўмовах адміністратыўнага арышту забяспечыць немагчыма", - гаворыцца ў заяве.

У сувязі з гэтым, Партыя БНФ патрабуе неадкладнага вызвалення Змітра Каспяровіча і пакарання супрацоўнікаў МУС, павінных у яго незаконным затрыманні і зняволенні.

Партыя БНФ звяртаецца да органаў пракуратуры з патрабаваннем ужыць захады пракурорскага рэагавання дзеля спынення незаконнага арышту Каспяровіча паводле пастановы, тэрмін выканання якой даўно мінуў.