У Брусэлі пройдзе канферэнцыя па Беларусі

Канферэнцыю ініцыявала Еўрапейская народная партыя, якая мае найбуйнейшую фракцыю ў Еўрапарлямэнце, піша Радыё Свабода.

Ад імя беларускай апазіцыі даклад пра сітуацыю ў краіне зробіць старшыня Аб’яднанай грамадзянскай партыі Анатоль Лябедзька. З мінскага аэрапорту лідэр АГП паведаміў карэспандэнту «Свабоды», што канферэнцыя па мадэрнізацыі Беларусі — добрая мажлівасць даслаць вестку еўрапейскім дэпутатам і чыноўнікам:

«Я буду гаварыць пра трохкрокавую стратэгію. Першы крок — вызваленне і рэабілітацыя палітвязняў. Другі — свабодныя і сумленныя выбары. Трэці — план мадэрнізацыі для Беларусі.

Асобным файлам пойдзе інфармацыя пра заяву „Намэнклатурная прыватызацыя як пагроза эканамічнаму сувэрэнітэту Беларусі“ дэпутатаў Вярхоўнага Савету 13 склікання, прынятую 15 сакавіка бягучага году. Дакумент надзвычай важны, які закранае інтарэсы ўсіх жыхароў Беларусі. Таму патрэбна, каб пра гэта ведалі не толькі ўнутры краіны, але і за яе межамі».

Лідэр руху «За свабоду» Аляксандр Мілінкевіч таксама ўдзельнічае ў гэтай імпрэзе: «Для бальшыні еўрапейцаў, якія клапоцяцца аб незалежнасці Беларусі, відавочна, што вельмі важным з’яўляецца аднаўленне дыялогу. Еўропа выступае за дыялог, але пры гэтым ніхто не ставіць пад сумнеў, што яго пачаткам павінна стаць вызваленне палітвязняў. Гэта нават не абмяркоўваецца.

На канферэнцыі будзе абмяркоўвацца і план мадэрнізацыі для Беларусі. Некаторыя ставяцца да яго скептычна, некаторыя яго хваляць. Асабіста я лічу, што гэта вельмі важная магчымасць паказаць, якой мае быць Беларусь».

Сярод тых, хто прадстаўляе Беларусь у Брусэлі ад імя грамадзянскай супольнасці, — дырэктар Цэнтру еўрапейскай трансфармацыі Андрэй Ягораў. Ён таксама лічыць, што еўрапейскі план мадэрнізацыі вельмі карысны для Беларусі:

«Праблема тут у выкарыстанні гэтага дакументу і ў тым, хто можа ім скарыстацца. На сённяшні час беларуская дзяржава ўхіляецца ад кантактаў з Еўрасаюзам. Яна фактычна не ўдзельнічае ў дыялогу па мадэрнізацыі і значна абмяжоўвае патэнцыял гэтага інструменту. З другога боку, удзел у гэтым палітычнай апазіцыі і грамадзянскай супольнасці з розных прычынаў таксама не вельмі інтэнсіўны.

І тут трэба памятаць, што „Ўсходняе партнёрства“ і еўрапейскі дыялог па мадэрнізацыі — гэта адзіная палітычная сувязь Беларусі з Еўраейскім Саюзам як наднацыянальнай структурай, якая яднае 27 краінаў Еўропы. І калі яе парваць, то гэта не паспрыяе разьвіццю Беларусі ні ў кароткачасовай, ні ў доўгатэрміновай перспектыве».