Еўрасаюз разгледзіць скаргі беларусаў наконт шэнгенскіх візаў

Пры разглядзе працэдуры выдачы кароткачасовых шэнгенскіх візаў Еўракамісія хоча ўлічыць думку іх атрымальнікаў. «Ідэя палягае ў тым, каб мадэрнізаваць візавую палітыку, і кансультацыя з грамадзкасцю павінна паспрыяць зменам у слушным кірунку», паведамляецца на сайце Еўракамісіі.

Камісія мае на мэце прапанаваць папраўкі да Візавага кодэксу, развіваць і мадэрнізаваць агульную візавую палітыку. Таму яна хоча пачуць меркаванні максімальна шырокага кола карыстальнікаў агульнай візавай палітыкі: як фізычных асобаў, так і супольнасцяў і арганізацый.

Кіраўніца «Офіса за дэмакратычную Беларусь» у Брусэлі Вольга Стужынская сказала карэспандэнту Свабоды:

«Вельмі важна, каб грамадзяне Беларусі ўдзельнічалі ў дадзеным апытанні і выказваліся наконт тых цяжкасцяў, з якімі яны сутыкаюцца пры атрыманні шэнгенскіх візаў. Нават у сітуацыі, калі няма палітычнай волі беларускага кіраўніцтва, каб распачаць дыялог з ЕС па дамовах аб візавай фасілітацыі і рэадмісіі, некаторыя палажэнні Візавага кодэксу могуць быць змененыя і дазволяць увесці, напрыклад, больш гнуткія інструменты што да перыяду разгляду заявак, спрасціць фармуляры і скараціць спіс дакумэнтаў, якія патрабуюцца на дадатак да самой заяўкі.

Вядома, такія магчымыя спрашчэнні — не такая мера, якая прывяла б да поўнага вырашэння візавай праблемы. Але, тым не менш, паскарэнне і спрашчэнне працэдуры афармлення візы дакладна дапамагло б нашым грамадзянам больш своечасова і эфэктыўна планаваць свае паездкі ў краіны Шэнгенскай дамовы.

На мой погляд, Еўрапейская камісія вельмі сур’ёзна паставіцца да вынікаў дадзенага апытання. Сярод іншых мэт, якія паўплывалі на ініцыяванне апытання, ёсць і эканамічная. Згодна з тэкстам прэс-рэлізу Еўракамісіі ад 7 лістапада мінулага году, краіны ЕС намераныя прыкладаць больш намаганняў, каб павялічыць колькасць турыстаў, якія іх наведваюць — гэта ўклад у эканоміку і адзін са сродкаў барацьбы з наступствамі эканамічнага крызісу».

Візавы кодэкс і агульная візавая палітыка тычацца толькі кароткатэрміновых візаў («шэнгенскія візы» на 90/180 дзён) і ўжываюцца ў 22 краінах-сябрах ЕС (Бэльгія, Чэская Рэспубліка, Данія, Германія, Эстонія, Грэцыя, Іспанія, Францыя, Італія, Латвія, Літва, Люксэмбург, Вугоршчына, Мальта, Нідэрлянды, Аўстрыя, Польшча, Партугалія, Славенія, Славаччына, Фінляндыя і Швэцыя) і чатырох асацыяваных дзяржавах (Ісландыя, Ліхтэнштэйн, Нарвэгія і Швайцарыя).