Старшыня Рады БНР у Дзень Волі сустрэлася з кіраўніком МЗС Чэхіі

“Мы пачалі ад пытання Незалежнасці Беларусі, узгадалі дасягненне нашае леташняе — «Віленскі Мемарандум» за Незалежнасць, а таксама заўважылі, да якой ступені апазіцыя з’ядналася для падпісання гэтага вельмі важнага для нас дакументу”, - распавяла Івонка Сурвіла ў размове з Радыё Свабода.

“Закранулі тэму Расіі і яе ўплыву на Беларусь, было прыемна адчуць, што спадар Шварцэнберг вельмі добра гэтую праблему ўсведамляе. Гаварылі мы і пра Шэнгенскія візы для грамадзянаў Беларусі. Спадар Шварцэнберг сказаў, штоў пытанні візаў фактычна не Еўропа супраціўляецца зменьшанню цаны і лібералізацыі візавага рэжыму, а — Беларусь”, - адзначыла старшыня Рады БНР.

Таксама падчас гутаркі закраналіся тэмы палітычных вязняў, акцый супраць хакейнага чэмпіянату ў Мінску ў 2014 годзе. “Таксама гаварылі пра фундацыю «Эразмус», Шварцэнберг казаў, што ён ужо доўга гэтым займаецца, што ён падтрымоўваў і будзе падтрымоўваць — з намерам дазволіць большай колькасці студэнтаў беларускіх атрымліваць стыпендыі ў Еўропе. Ну і апошні пункт, які мы закранулі — гэта справа надання беларусам у Чэхіі статусу нацыянальнай меньшасці, пра што ён таксама дакладна ведаў і гэтую прапанову ён таксама падтрымлівае”, - сказала Івонка Сурвіла.