Юстас Палецкіс: Беларускія ўлады могуць вырашыць пытанне палітвязняў

З 18 па 21 сакавіка Палецкіс знаходзіцца ў Менску, дзе збірае матэрыялы для свайго дакладу на пленарным паседжэнні дэпутатаў Еўрапарламенту.

Праблему вызвалення палітвязняў дакладчык па Беларусі назваў «пытаннем з пытанняў». Спадар Палецкіс у інтервью Радые Свабода сказаў, што ўздымаў гэтую праблему на ўсіх сустрэчах, найперш з афіцыйнымі беларускімі чыноўнікамі:

«Гэта сапраўды пытанне з пытанняў. І цяпер, наколькі я зразумеў, Мінск не з’яўляецца болей закасцянелым і негатовым рашаць гэтыя пытанні. На мой погляд, гэта цалкам магчыма. Але калі і як гэта адбудзецца, пакуль вельмі цяжка сказаць».

На пытанне аб удакладненні пра рэабілітацыю палітвязняў дакладчык па Беларусі адказаў наступнае:

«Я большай часткай меў размовы з апазыцыяй і грамадзянскай супольнасцю. Болей, чым з афіцыйнымі асобамі. У іх таксама вельмі розныя думкі. Адны кажуць, што патрабаваць рэабілітацыі нерэальна. Іншыя кажуць, што павінны быць абавязкова і вызваленне, і рэабілітацыя. Мусіць, тут сапраўды ёсць над чым падумаць».

«Я казаў пра неабходнасць патрабавання з боку Еўрасаюзу і яго структураў да беларускіх уладаў аб абавязковай рэабілітацыі палітвязняў», — заявіў «Свабодзе» старшыня Аб’яднанай грамдзянскай партыі Анатоль Лябедзька, які сустракаўся з Юстасам Палецкісам сам-насам.

Анатоль Лябедзька:

«Ён хацеў чуць прапановы, якія б маглі быць да гэтага дакладу. Мая галоўная думка — высілкі і намаганні канцэнтраваць не на тым, што кансервуе сытуацыю, а на тым, што яе мяняе. Гэта азначае, што трэба канцэнтравацца не на маленькіх, дробных пытаннях, а ўсё ж такі сфакусавацца на галоўных. А гэта — вызваленне і рэабілітацыя палітычных вязняў, вольныя, справядлівыя выбары, плян мадэрнізацыі для Беларусі».

Спадар Палецкіс сказаў «Свабодзе», што ўжо ў наступным месяцы ён прадставіць першы праект свайго дакладу аб сітуацыі ў Беларусі. Гэта будзе невялікі тэкст памерам чатыры машынапісныя старонкі.