Мінск не збіраецца спрашчаць візавы рэжым з ЕС

Даклад прадставілі ў Брусэлі вярхоўны камісар Еўрасаюзу па замежных справах Кэтрын Эштан і камісар па справах пашырэння і палітыкі суседзтва Штэфан Фюле, паведаиляе Радыё Свабода. Аўтары дакладу прыйшлі да высновы, што краіны Ўсходняй Еўропы ідуць чым далей рознымі шляхамі. Малдова, Грузія і Арменія працягваюць дэмакратычныя рэформы, праведзеныя тут выбары, як правіла, адпавядалі міжнародным стандартам. Парламенцкія выбары ва Ўкраіне былі адзначаныя шэрагам недахопаў і адышлі ад раней дасягнутых стандартаў. Азербайджану рэкамендуецца больш паслядоўна выконваць свае абавязкі ў галіне дэмакратыі, у тым ліку выбарчых працэсаў. Выбары ў Беларусі, адзначаецца ў дакладзе, адбываліся на агульным фоне рэпрэсій.

На цяперашнім этапе дапамога Еўрасаюзу Беларусі абмежаваная ў маштабах і факусуецца непасрэдна ці ўскосна на падтрымцы патрэбаў насельніцтва і дэмакратызацыі. Улічваючы складаную палітычную сытуацыю ў краіне і санкцыі, накладзеныя на кіраўніцтва і часткова на дзяржсектар эканомікі, еўрапейская праграма партнёрства робіць акцэнт на ўдзеле грамадзянскай супольнасці і ў той жа час захоўвае тэхнічны кантакт з беларускай адміністрацыяй, прынамсі, на мясцовым узроўні.

У дакладзе адзначаецца, што на праграмы двухбаковага супрацоўніцтва Беларусі на працягу 2007-2011 было выдзелена 43 млн. еўра і ў пэрыяд 2012-2013 гадоў 28,5 млн. еўра. Беларусь удзельнічае ў асноўным у праектах галіны аховы навакольнага асяродздзя, адукацыі і транспамежнага супрацоўніцтва. У той жа час Беларусь застаецца выключанай з сыстэмы еўрапейскіх гандлёвых прэфэрэнцый (пастанова дзяржаў-сябраў ЕС, прынятая на падставе сур’ёзных і сыстэматычных парушэнняў Беларуссю асноўных стандартаў Міжнароднай арганізацыі працы ўступіла ў сілу ў 2007 годзе.)

У чэрвені 2011 году Камісія ЕС прапанавала Беларусі пачаць перамовы па спрашчэнні візавага рэжыму і пагадненні аб рэадмісіі ў інтарэсах насельніцтва ў цэлым. Пакуль беларускія ўлады не адгукнуліся на прапанову. І пры адсутнасці адказу, 23 сакавіка і 15 кастрычніка 2012 году Рада замежных спраў вітала намер дзяржаў-сябраў ЕС у аднабаковым парадку забяспечыць аптымальнае выкарыстанне існуючых гнуткіх магчымасцяў, якія дае візавы кодэкс. Гэта ў прыватнасці, магчымасці адмяніць візы або зменшыць іх кошт для пэўных катэгорый грамадзян Рэспублікі Беларусь.

Аўтары дакладу таксама робяць акцэнт на апошняй прапанове, агучанай год таму еўракамісарам Штэфанам Фюле — Дыялог па мадэрнізацыі. Гэты дыялог уключае абмен поглядамі і ідэямі паміж прадстаўнікамі беларускай грамадзянскай супольнасці і дзяржавамі Еўрасаюзу. На думку дакладчыкаў, дыялог спрыяе нармалізацыі адносін паміж ЕС і Беларуссю, а таксама вызначае курс рэформаў і мадэрнізацыі ў інтарэсах беларускага народу.