Уладзімір Макей і Штэфан Фюле правялі перамовы ў Тбілісі

“Беларусь з’яўляецца адным з нашых партнёраў. Але, на жаль, трэба адзначыць, што Беларусь з’яўляецца нашым адзіным партнёрам, з якім мы не маем заканадаўчай базы для моцных двухбаковых стасункаў, як з іншымі партнёрамі”, - сказаў еўракамісар у пытаннях пашырэння і палітыкі добрасуседства Штэфан Фюле падчас прэс-канферэнцыі па выніках перамоваў, перадае Радыё Свабода.

Таксама прадстаўнік ЕС сказаў наступнае:

"Ну і яшчэ трэба адзначыць той відавочны факт, што існуе адмысловая палітыка Еўрасаюзу ў адносінах да Беларусі, абапёртая на трох слупах. Еўрасаюз працягвае падтрымліваць сваю пазіцыю, заснаваную на прынцыпах, на якія абапіраецца ўсё Усходняе партнёрства. У такіх абставінах Еўрасаюз можа толькі раз-пораз падкрэсліваць, што для Беларусі існуе перспектыва поўнага развіцця адносінаў, якім карыстаюцца іншыя нашы партнёры. Перадумовай для гэтага развіцця з’яўляецца вызваленне палітвязняў. Адначасова мы развіваем дыялог аб мадэрнізацыі — гэта адно з пытанняў, якое мы маем намер абмеркаваць з міністрам [Макеем — РС]. Гэта магчымасць ангажаваць прадстаўнікоў беларускага ўраду на рабочым узроўні у дыялог аб тым, якім чынам Еўрасаюз мог бы дапамагчы ў мадэрнізацыі Беларусі. Гэты дыялог цяпер мы праводзім з прадстаўнікамі грамадзянскай супольнасці ў Беларусі".

У адказ кіраўнік беларускай дыпламатыі выклаў сваё бачанне месца Беларусі ў праграме «Ўсходняе партнёрства» і ролі яе стасункаў з Еўарсаюзам:

“Ад самага пачатку мы былі раўнапраўным партнёрам ва „Ўсходнім партнёрстве“. Мы застаемся ў гэтай ініцыятыве і будзем заставацца, пакуль, я й не ведаю, што можа здарыцца. Ведаеце, у нашых адносінах з Еўрасаюзам ёсць пэўныя праблемы, але я думаю, што нам трэба вырашыць гэтыя праблемы спакойным чынам у адкрытым дыялогу. І я спадзяюся, што такі дыялог адбудзецца ў нас заўтра са спадарыняй Эштан і камісарам Штэфанам Фюле. Я думаю, што не ізаляцыя, а ангажаванасць у еўрапейскі інтэграцыйны працэс можа дапамагчы нашай краіне стаць дэмакратычнай і заможнай. Гэта наша пазіцыя”.