Улады Беларусі праяўляюць цікавасць да Еўрапейскага дыялогу па мадэрнізацыі

“Беларускі бок сапраўды дасылаў свае прапановы, і, магчыма, новая інфармацыя з'явіцца па выніках сустрэч, што праходзяць гэтымі днямі ў Тбілісі”, — паведамілі “Еўрарадыё” у Прадстаўніцтве ЕС у Беларусі.

Палітолаг Дзяніс Мельянцоў ужо пазнаёміўся з тэкстам ліста. Паводле яго слоў, афіцыйны Мінск незадаволены тым, што на гэты момант “Дыялог” адбываецца толькі з прадстаўнікамі беларускай апазіцыі і грамадзянскай супольнасці. Улады прапануюць перайменаваць “Дыялог” у “Партнёрства па мадэрнізацыі” — аналаг расійскага супрацоўніцтва з ЕС.

Дзяніс Мельянцоў: “Ён прадугледжвае сабой практычна такую ж структуру працы, як ва “Усходнім партнёрстве”: рэгулярныя сустрэчы на ўзроўні экспертаў, міністраў і саміт раз на год. Ён прадугледжвае, што ў межах “Партнёрства” будуць супрацоўнічаць толькі дзяржаўныя ўстановы. І глыбіню мадэрнізацыі будзе вызначаць беларускі бок”.

Таксама беларускія ўлады прапануюць па меры развіцця партнёрства падключаць грамадзянскую супольнасць. Прычым пад грамадзянскай супольнасцю разумее… бізнес-асацыяцыі.