Андрэй Ягораў:Не факт, што жорсткая палітыка да Беларусі ўплывае на сітуацыю ў краіне

О нас в медиа

Такое меркаванне дырэктар Цэнтра еўрапейскай трансфармацыі , сябра рады кансорцыюму "ЕўраБеларусь" Андрэй Ягораў выказаў у каментары "Еўрарадыё".

Нагадаем, што кіраўнік амерыканскай праваабарончай арганізацыі Freedom House Дэвід Крэмер прапанаваў не запрашаць беларускія ўлады на віленскі саміт "Усходняга партнёрства" ў лістападзе. Ягораў ахарактарызаваў Крэмера як паслядоўнага прыхільніка жорсткай крытыкі беларускага рэжыму.

Ягораў: "Як бачыць сітуацыю кансорцыюм "ЕўраБеларусь", то мы не маем ніякіх доказаў таго, што больш жорсткая палітыка да Беларусі ўплывае на сітуацыю ўнутры Беларусі і што Еўрасаюз такімі крокамі можа прымусіць беларускі рэжым да зменаў".

Ягораў ухваляе цяперашнюю пазіцыю Еўрасаюзу, які не выключае Беларусь з агульнаеўрапейскіх працэсаў, але абмяжоўвае кантакты да вызвалення і рэабілітацыі палітвязняў. Уключанасць у еўрапейскія працэсы палітолаг называе неабходнай для будучага развіцця Беларусі.

Палітолаг не выключае, што Еўрасаюз і ЗША будуць спрачацца наконт краінаў "Усходняга партнёрства".

Ягораў: "Інтарэсы Еўрапейскага Саюза ў краінах суседства моцна адрозніваюцца ад інтарэсаў, якія тут ёсць у Злучаных Штатаў. Таму, натуральна, тут могуць быць і будуць разыходжанні. Але ж Злучаныя Штаты ў дадзеным выпадку не будуць настойваць на нейкіх зменах стратэгіі ЕС наконт Усходняга партнёрства, бо гэта сфера геапалітычнага ўплыву Еўрапейскага саюзу".