Лешак Шарэпка: Лібералізацыя візавых правіл ЕС залежыць ад беларускага боку

Падчас адкрыцця новага офісу пасольства Польшчы на вуліцы Змітрка Бядулі ў Мінску Лешак Шарэпка адказаў на пытанні Радыё Свабода.

“Летам мінулага году Еўрасаюз перадаў прапанову беларускім уладам аб лібералізацыі правілаў візавага руху паміж Еўрасаюзам і Беларуссю. Беларускі бок ведае гэтыя ўмовы. І там ёсьць канкрэтная цана візаў для беларусаў — 35 эўра. І там ёсць аж 16 катэгорый ільготнікаў. Напрыклад, журналісты, дзеці, спартоўцы, пенсіянеры, артысты, бізнэсоўцы… І тут усё залежыць ад таго, наколькі сур’ёзна хацеў бы пра гэта гаварыць беларускі бок”,- распавёў пасол Польшчы.

Што тычыцца працэдуры перасячэння мяжы жыхарамі памежных рэгіёнаў, то Лешэк Шарэпка паведаміў наступнае: “Мы чакаем ад беларускага боку ноты, якая дасьць старт гэтаму працэсу. З нашага боку ўсё ўжо падрыхтавана яшчэ больш за год таму. Інфраструктура на мяжы нядрэнная. Але я хацеў бы паразмаўляць зь беларускім бокам, каб яе яшчэ болей разьвіць. І тут ёсьць інвэстыцыі Эўразьвязу на супольнай мяжы. Ёсьць, напрыклад, ідэі, каб займаць чаргу на перасячэньне мяжы праз інтэрнэт, што аблегчыць жыцьцё многім людзям. І гэта добрыя зрухі”.

“Але ёсьць і дрэнныя. Напрыклад, беларускі бок кажа, што ня будзе гэтым займацца, бо не атрымлівае грошай ад Эўразьвязу. Я чакаю магчымасьці абмеркаваць гэта з новым кіраўніком Памежнага камітэту Беларусі. Чакаю ўжо два месяцы",- сказаў пасол Польшчы.

Нагадаем, што прэс-сакратар МЗС Беларусі Андрэй Савіных таксама паведамляў пра тое, што Беларусь вядзе перамовы з ЕС аб спрашчэнні візавага рэжыму.