Андрэя Бандарэнку пераводзяць у магілёўскую турму

“У ПКТ мяне змясцілі на 2 месяцы і, паводле слоў кіраўніцтва, за гэты час мяне перавядуць на турэмны рэжым. Наколькі я разумею — у Магілёў. Да гэтага яшчэ мусіць быць камісія і суд, бо паводле закону на турэмны рэжым пераводзяць па вызначэнні суду”, — напісаў Андрэй Бандарэнка.

Вязень паведаміў, што раней разлічваў на амністыю, прымеркаваную да ўгодкаў Перамогі, але пасля таго, як яго пакаралі карцэрам і зрабілі з злосным парушальнікам рэжыму, ён зразумеў, што не можа разлічваць не толькі на гэтую, але і на будучую амністыю.

“Шанцаў і на будучую амністыю, калі прымуць у 2016 годзе, таксама нуль. Абавязкова знойдуць „пыл“ у камэры ці гузік не будзе зашпілены”, — адзначыў Бандарэнка.

Вязень мяркуе, што яму давядзецца да канца тэрміну быць ў турме, паведамляе “Радыё Свабода”.