Аўтар “Дарогі на Курапаты” распавядзе пра вусную гісторыю ў кіно

У размове возьмуць удзел знакаміты рэжысёр Міхаіл Жданоўскі ды прадстаўнікі новага пакалення дакументалістыкі.

Беларуская дакументалістыка налічвае не адзін дзясятак гадоў, а студыя «Летапіс» вядома большасці беларусаў. Адсюль выйшла «Дарога на Курапаты» рэжысёра Міхаіла Жданоўскага, самая яскравая на дадзены момант беларуская дакументальная стужка з выкарыстаннем вуснай гісторыі, дзе візуальна ўвасобілася важнае навуковае адкрыццё – масавае знішчэнне людзей у часы Савецкага Саюза.

Падчас сустрэчы абмяркуюць не толькі кіно канца мінулага стагоддзя, але і на сучасныя тэндэнцыі: ці выкарыстоўваецца вусная гісторыя рэжысёрамі цяпер, якія тэмы закранаюцца творцамі і ці мае сучаснае дакументальнае кіно хоць якое ўздзеянне на грамадства. Не застануцца па-за ўвагай пытанні цэнзуры і самацэнзуры.

Гасцямі Клуба вуснага гісторыка на гэты раз стануць рэжысёры Міхаіл Жданоўскі, Ягор Сурскі ды Алесь Лапо.

Паседжанне адбудзецца 30 лістапада ў 18.30 у Гістарычнай майстэрні (Мінск, вул. Сухая, 25). Уваход вольны!