26 лістапада ў Мінску — "Public Space Day. Людзі і супольнасці паміж хмарачосамі"

26 лістапада 2017 года Лятучы ўніверсітэт, альманах "Гарадскія тактыкі", Беларуская партыя "Зялёныя", Таварыства "Зялёная сетка", "Архітэктурнае бюро 35" запрашаюць засяродзіцца на сацыяльным, палітычным і гуманітарным вымярэннях "грамадскіх прастораў".

Горад — адзінства непадобных. Непадобных, але са-прысутных і камунікуючых у адной прасторы. Гэтая камунікацыя патрабуе адмысловых умоў і высілкаў, каб гарадская прастора не стала дадатковым бар’ерам для людзей, перашкодай для выяўлення сваёй ідэнтычнасці і ўзаемадзеяння.

"Грамадская прастора" мае самыя розныя вымярэнні: ад архітэктуры і інфраструктуры плошчаў, двароў і вуліц да культуры ўзаемадзеяння, магчымасцей самарэпрэзентацыі і сімвалічнага ўвасаблення дзеючых норм паводзін.

Public Space Day прысвечаны чалавечаму і сацыяльнаму вымярэнню грамадскіх прастор. Мы запрасілі тых, хто даследуе і робіць праекты ў сучасных гарадах, каб абмеркаваць: "Як магчыма будаваць суседскія супольнасці вакол трансфармацыі двароў?" Падчас імпрэзы мы абмяркуем двары і пешаходныя зоны як кропкі канцэнтрацыі камунікатыўных практык і магчымасцей узаемадзеяння.

Мэта правядзення Public Space Day: акцэнтаванне ўвагі грамадскасці і спецыялістаў (актывістаў і прафесіяналаў) на сацыяльным, палітычным і гуманітарным вымярэннях "грамадскіх прастораў". Праз прэзентацыі і дыскусіі мы пазнаёмімся з рознымі практыкамі, якія рэалізуюць у Беларусі і за яе межамі адносна працы з такімі прасторамі, як двор і пешаходная зона.

Public Space Day пройдзе 26 лістапада, у нядзелю, у культурным цэнтры "Корпус" (Мінск, прасп. Машэрава, 9). Пачатак а 15-й гадзіне. Уваход вольны!

Папярэдняя праграма мерапрыемства

Сачыць за навінамі мерапрыемства можна ў Фэйсбуку