Лявон Вольскі: Пакуль не будзе свабоды, не будзе і вялікіх музычных фэстаў

Магчымасці для развіцця фестывальнага руху на Беларусі з’явяцца толькі пасля таго, як будуць знятыя абмежаванні на канцэртна-гастрольную дзейнасць.

Пра гэта ў размове са Службай інфармацыі “ЕўраБеларусі” сказаў вядомы беларускі музыка Лявон Вольскі.

Напрыканцы лета – у пачатку восені ў ваколіцах Мінска назіраецца цэлы шэраг музычных фестываляў: 24 жніўня на хутары “Шаблі” ў Валожынскім раёне прайшло “Вольнае паветра”, 25 жніўня ў Дудтках адбыўся фестываль “Млын”, а сення, 7 верасня, у музеі народнай архітэктуры і побыту каля пасёлку Азярцко пройдзе фолк-фэст “Камяніца”. Ці можна казаць, што фестывалі змогуць кампенсаваць беларусам недахоп канцэртаў, які назіраецца з-за пастаянных забаронаў з боку ўладаў?

Лявон Вольскі паставіўся да такой ідэі скептычна: “Фестывальны рух у Беларусі таксама праводзіцца з пэўнымі абмежаваннямі. Мы ж не бачым на фестывалях “Ляпіса Трубяцкога” ці Змітра Вайцюшкевіча. Добра, канешне, што ёсьць тое, што ёсьць. Але агулам наш фестывальны рух цяжка апісаць. Ён як бы і ёсць, але і не такі магутны. З аднаго боку, нешта адбываецца, з іншага – усё гэта досыць камерна.

Я баюся, што пытанні пра якасць фестывальнага руху ў нашай сітуацыі не вельмі дарэчы. Бо ў нашай сітуацыі ўвесь так званы шоў-бізнэс знаходзіцца ўвесь час у адным і тым жа крыху ўзважаным стане. Не думаю, што можа ісці гаворка пра развіццё нейкіх незалежных фестывальных рухаў”.

На думку музыкі, развіццё фестывальнай культуры магчымае толькі пасля зняцца рознага кшталту абмежаванняў і забаронаў, якія існуюць зараз у Беларусі. “Калі будзе больш свабоды, будуць большыя фестывалі. Абмежаванні ёсць ужо на працягу 10 гадоў. Таму і атрымліваецца, што ёсць такі фармат фестывалю, калі збіраецца каля трох тысячаў, праводзяцца этнічныя фестывалі. Але мы не бачым тут гіганцкіх фестываляў на 100 тысяч чалавек. Тут для гэтага нічога не гатова, бо існуюць абмежаванні, які не ўласцівыя нармальным фестывалям. Напрыклад, абмежаванні на продаж піва. Пакуль усё будз знаходзіцца пад кантролем, і не будзе свабоды, усё так і будзе заставацца”, – падкрэсліў Лявон Вольскі.

Іншыя перашкоды ў развіцці фестывальнай культуры, на ягоную думку, цалкам перадольныя. Таму будзе каму фестывалі ладзіць, і каму на іх прыязджаць. “У нас вельмі шмат энтузіястаў, якія б узяліся праводзіць фестывалі, каб не ўся гэтая гастроле-канцэртная палітыка. Але хутчэй за ўсё будзе працягвацця панаванне таго, што мы маем, – спрагназаваў Лявон Вольскі. – Калі з’явяцца фестывалі, знойдуцца адразу аматары. У любой краіне мы гэта назіраем: збіраюцца 100-150 тысяч чалавек. Проста ў нас людзі цяпер да гэтага не прывучаныя. Але за пару гадоў гэта можна зрабціь. Ды і здараецца, што на розныя фестывалі, куды прыязджаюць расійскія зоркі, людзі ўсё ж збіраюцца”.