Алег Трусаў: Шлях толькі адзін - размаўляць 25 гадзін у суткі на сваёй мове

Старшыня Таварыства беларускай мовы кажа, што Мінадукацыі ідзе на хітрасць, калі гаворыць пра свабодны выбар мовы вывучэння ў школе.

Нагадаем, 15 жніўня міністр адукацыі Сяргей Маскевіч заявіў, што ў гэтым годзе ў школах Беларусі не будзе ўводзіцца абавязковае вывучэнне гісторыі і геаграфіі Беларусі на беларускай мове. Маўляў, гэта павінна быць выбарам бацькоў і саміх вучняў. Але яшчэ ў маі мінулага года Мінадукацыі казала пра магчымасць вяртання гэтых прадметаў на роднай мове. Хаця была зроблена і агаворка, што гэта будзе каштаваць вялікіх грошай. Пры гэтым сам Маскевіч кажа, што ён асабіста - толькі за тое, каб вучні выбіралі мовай вывучання школьных прадметаў беларускую.

- Мы звярталіся яшчэ год шэсць таму, каб у школы вярнулі выкладанне гэтых прадметаў на беларускай мове, - нагадвае ў размове са Службай інфармацыі "ЕўраБеларусі" Алег Трусаў, старшыня Таварыства беларускай мовы імя Францішка Скарыны. - Ну вось гэтую падачку - выбар мовы навучання бацькамі і вучнямі - яны нам і кінулі. Ёсць, канешне, такія выпадкі, калі бацькі абіраюць беларускую мову мовай навучання, але гэта - выключэнне. І Міністэрства адукацыі ідзе на хітрасць, калі кажа пра свабоду выбара. Ніхто ў бацькоў нічога не пытаў, калі тагачасны міністр адукацыі Аляксандр Радзькоў скасаваў абавязковае выкладанне гісторыі і геаграфіі на беларускай мове. І, як паказвае статыстыка, за гэтыя гады рэзка знізілася колькасць абітурыентаў, што выбіралі тэставанне па гэтых прадметах па-беларуску. Гэта вынік агульнай палітыкі, усё той жа палітыкі маскоўскіх імперыялістаў.

- Дык як змагацца з гэтай палітыкай? Ці ўсё безнадзейна?

- Шлях толькі адзін - размаўляць 25 гадзін у суткі на беларускай мове. Толькі сваім прыкладам даказваць. Іспанцы 150 гадоў спрабавалі прымусіць галандцаў перастаць размаўляць на сваёй мове - не атрымалася. Ну а тут усяго толькі 20 гадоў - так што яшчэ нічога не згублена.