Уладзімір Галянкоў: Інтэлектуальныя сістэмы – не фантастыка (Фота і відэа)

Фота Службы інфармацыі "ЕўраБеларусі"

Што замінае развівацца рынку інтэлектуальных сістэм у Беларусі?

У межах Тыдня беларускага мыслення адбылася публічная лекцыя, арганізаваная Лятучым універсітэтам і Міжнародным кансорцыюмам “ЕўраБеларусь” “Інтэлектуальныя сістэмы: праблемы і перспектывы”.

Выступоўца – доктар тэхнічных навук, прафесар Уладзімір Галянкоў 40 гадоў займаецца праблемай штучнага інтэлекту і інтэлектуальнымі сістэмамі, выгадаваў мноства вучняў. Яго студэнты (Уладзімір Васільевіч выкладае ў БДУІР) цягам некалькіх гадоў з’язджалі працаваць у вядучыя цэнтры ІТ-сферы свету.

Фота Службы інфармацыі "ЕўраБеларусі".

Падчас лекцыі Уладзімір Галянкоў разглядаў праблемы развіцця рынка інтэлектуальных сістэм. “Чалавецтва павінна саспець да гэтага”,  – зазначыў выступоўца.

Дык што ж такое ўвогуле інтэлектуальная сістэма? Існуе некалькі яе азначэнняў. Напрыклад, што гэта камп’ютарная сістэма, у ходзе стасункаў з якой узнікае адчуванне, што вы стасункуеце з чалавекам. Ці што гэта камп’ютарная сістэма, якая можа вырашаць інтэлектуальныя задачы, альбо тыя задачы, з якімі традыцыйная камп’ютарная сістэма не спраўляецца. Але найбольш дакладнае азначэнне інтэлектуальнай сістэмы – тая сістэма, якая здольна набываць новыя веды і ўменні і не мае абмежаванняў у пашырэнні сваіх магчымасцяў. Інтэлектуальная сістэма заснаваная на ведах і прадметна незалежных (універсальных) механізмах рашэння задач.

Як падкрэсліў Уладзімір Галянкоў, пераход ад традыцыйных камп’ютарных сістэм да інтэлектуальных – гэта лагічны этап іх эвалюцыі.

Навошта нам патрэбныя інтэлектуальныя сістэмы? Па-першае, для істотнага павышэння ўзроўню аўтаматызацыі чалавечай дзейнасці. Па-другое, для пераводу сучасных інфармацыйных (камп’ютарных) тэхналогій на прынцыпова новы, больш дасканалы ўзровень. Ну і па-трэцяе, пераход да іх непазбежны. “Інтэлектуальныя сістэмы – не фантастыка”, – запэўніў дакладчык.

Фота Службы інфармацыі "ЕўраБеларусі".

Тым не менш попыт на інфармацыйныя сістэмы пакуль што перавышае прапанову нават пры даволі высокім узроўні навуковых вынікаў. Асноўная прычына гэтага – адсутнасць шырокага кантынгенту інжынераў, іх у нас проста ніхто не рыхтуе.

Апроч таго павінна існаваць агульная тэхналогія распрацоўкі інтэлектуальных сістэм, створана эфектыўная методыка навучання інжынераў інтэлектуальных сістэм.

“Навука ёсць, а інжынерыі пакуль няма. Але яе трэба развіваць”, – канстатаваў прафесар.

У той жа час развіццё рынка інтэлектуальных сістэм – выклік не толькі для інжынераў, але і для навукоўцаў, бо тэхналогія распрацоўкі павінна пастаянна ўдасканальвацца.

Але патрабаванні ёсць не толькі да стваральнікаў, але і да карыстальнікаў інтэлектуальных сістэм, а таксама да тэхналогіі іх распрацоўкі. Калі казаць глабальна, то для развіцця рынка інтэлектуальных сістэм неабходна ўзаемадзеянне навукі, адукацыі, інжынерыі і бізнеса, а гэтага ўзаемадзеяння ў нас бракуе, зазначыў выступоўца.

“Калі мы зразумеем, што такое сэнс, як яго фармалізаваць і змясціць у памяць камп’ютара, тады развяжуцца шматлікія пытанні”, – паабяцаў ён. І падсумаваў:

“Навучыцца рабіць інтэлектуальныя сістэмы можна толькі адным спосабам – рабіць інтэлектуальныя сістэмы”.

Фота Лятучага ўніверсітэту.

Відэазапіс публічнай лекцыі: