Японія пратэстуе супраць рашэння Расіі даць назвы спрэчным астравам

«Гэта непрымальна і супярэчыць пазіцыі Японіі. Дыпламатычнымі каналамі мы накіравалі ноту пратэсту Расіі», — сказаў генеральны сакратар ураду Ёсіхідэ Суґа на прэс-канферэнцыі ў Токіа 14 лютага.

Як перадае Радыё Свабода, прэмʼер-міністр Расіі Дзмітрый Мядзведзеў на мінулым тыдні заявіў пра тое, што Масква дала імёны пяці астравам. Адзін з іх названы ў гонар генерала Кузьмы Дзеравянкі, які падпісаў акт аб капітуляцыі Японіі ў 1945 годзе; іншая назва ўшаноўвае савецкага дыпламата Андрэя Грамыку, які быў міністрам замежных спраў Савецкага Саюза з 1957 да 1985 года.

Савецкія войскі захапілі японскія астравы Шыкатан, Кунашыр, Ітуруп і Хабамаі, а таксама шэраг неназваных участкаў сушы ў 1945 годзе — пасля таго, як Японія капітулявала. Тэрытарыяльныя спрэчкі перашкодзілі дзвюм краінам заключыць мірную дамову. Токіа настойвае на вяртанні гэтых выспаў, якія называе Паўночнымі тэрыторыямі.