Палякі пратэстуюць супраць ветракоў паблізу дамоў

У Заходнепаморскім ваяводстве ў мясцовасці Бясекеж жыхары пратэстуюць супраць ветракоў у блізкім суседтве са сваімі дамамі, піша Беларуская рэдакцыя Польскага радыё. Жыхары зладзілі пікет ля сядзібы мясцовых уладаў, а таксама блакуюць рэспубліканскую дарогу № 6. Такім чынам жыхары Бясекежа імкнуцца не дапусціць да прыняцця на паседжанні рады гміны пастановы аб усталяванні 12-ці ветракоў.

«Як можна так блізка ставіць ветракі? Мы падтрымаем ідэю, калі яны будуць далей ад жылых дамоў, напрыклад, у адлегласці 2-3 кіламетраў, а на 500 метраў мы ня згодныя. Вядома, што ветракі шкодныя, акрамя гэтага нашыя нерухомасці страцяць вартасць».

Ветравыя электрастанцыі ў гміне Бясекеж ужо доўгі час з'яўляюцца крыніцай грамадскіх канфліктаў і выклікаюць пратэсты жыхароў. Нядаўна яны пратэставалі ў Сейме.
Аднак для гміны ветракі давалі б дадатковы прыбытак. Ад аднаго ветрака за год -- амаль 100 тысяч злотых (25 тыс. эўра).