Кіраўніка клуба «Патрыёт» адпусцілі: Тое, што адбываецца - нейкі жах

«Міколу адпусцілі. З 19.07 учора — да раніцы сёння допыты, вобшукі — дом, лецішча, гараж — адпусцілі. Але не факт, што не будуць спрабаваць па іншых артыкулах», — паведаміў у фэйсбуку заснавальнік «Белага лёгіёна» Сяргей Чыслаў.

23 сакавіка Мікалая Міхалькова выклікалі ў бабруйскае КДБ. Яго сына Яна, вайскоўца, затрымалі па справе аб падрыхтоўцы асобаў да ўдзелу ў «масавых беспарадках».

 Мікола Міхалькоў кажа Свабодзе, што яго сына Яна пакуль не адпусцілі. Ён абураецца затрыманнямі чальцоў яго клуба:

«Усе хлопцы, якія былі ў мяне ў клубе, не маюць ні да экстрэмізму, ні да тэрарызму, ні да падрыхтоўкі баевікоў, — кажа Міхалькоў. — Абсалютна нармальныя, адэкватныя хлопцы, афіцэры! Яны сапраўдныя патрыёты сваёй краіны — відавочна не збіраліся распальваць у сябе дома пажар».

Ён кажа, што супраць яго ніякіх абвінавачанняў «пакуль не прад’яўлялі». Колькі чалавек з клуба «Патрыёт» затрымалі, ён пакуль ня ведае: кажа, парадку 8-10 чалавек, але дадае: не ўпэўнены, бо «літаральна паўтары гадзіны як сам хаджу, не разумею, на якім свеце».

«Тры з іх толькі нядаўна ажаніліся, сын толькі нарадзіўся, яшчэ месяцу няма. Уявіце сабе, што маладыя афіцэры сваю кар’еру пачнуць з такога, будучы патрыётамі сваёй краіны, — дадае Міхалькоў. — Я вельмі-вельмі здзіўлены ўсёй гэтай сітуацыяй, бо гэта на роўным месцы фактычна. Тое, што адбываецца — гэта нейкі жах».