Сейм Польшчы адмовіўся даваць месца для правядзення канферэнцыі з удзелам Дзерманта і Шпакоўскага

 Арганізатарамі выступілі еўраскептычныя партыі «Свабодныя і салідарныя» і «Адзінства народу».

Як стала вядома Свабодзе, увечары ў панядзелак ганаровы віцэ-спікер Сейму Корнэль Маравецкі, прыняў рашэнне не праводзіць яе ў Сейме.

Яшчэ ранкам у высланай СМІ праграме яго імя значылася сярод арганізатараў. З беларускага боку ў сустрэчы анансаваўся ўдзел праўладных палітолагаў Аляксея Дзерманта, Аляксандра Шпакоўскага і Пятра Пятроўскага.

Як распавёў гісторык Мікола Іваноў, які меўся мадэраваць сустрэчу, Корнэль Маравецкі першапачаткова не быў азнаёмлены з біяграфіямі часткі ўдзельнікаў канферэнцыі.

"Я таксама раней пра многіх не меў уяўлення. Мне спачатку сказалі, што гэта маладыя навукоўцы. Потым я атрымаў пра гэтых людзей інфармацыю і цяпер маю разуменне, хто гэта. Гэта вельмі правакацыйныя асобы. Я размаўляў з Корнэлем Маравецкім і ён таксама не хоча мець з гэтым нічога супольнага. Таму ў Сейме гэтая канферэнцыя не адбудзецца. На мае словы пра тое, што частка ўдзельнікаў гэта «агенты Расіі», арганізатар канферэнцыі адказаў, што і іх варта паслухаць. Магчыма, ён будзе праводзіць яе ў іншым месцы. Але я яшчэ не прыняў рашэнне, ці буду ў ёй удзельнічаць", - сказаў гісторык.

Першапачаткова ў праграме было прозвішча былога кандыдата ў прэзідэнты Аляксандра Мілінкевіча, але ён сказаў, што адмовіўся прымаць у ёй удзел. Прычынай стала скандальная рэпутацыя яе ўдзельнікаў.