Ля Курапатаў паставілі намёт для пратэстоўцаў — будзе кругласутачная вахта (ФОТА)

Доўгатэрміновай акцыяй у абарону мемарыялу сталінскіх ахвяраў у Курапатах кіруе лідар "Маладога фронту" Зміцер Дашкевіч, перадае Радыё Свабода.

Каля месца будаўніцтва офіснага цэнтру будзе вахта, дзяжурства праціўнікаў гэтага будаўніцтва, па прыкладзе доўгатэрміновай акцыі 2001–2002 гадоў, калі тут будавалася Мінская кальцавая дарога, паведаміў Дашкевіч.

«Мы робім гэта для таго, каб абараніць Курапаты. Гэта ахоўная зона вакол Курапатаў. Спадзяёмся, што далучацца і жыхары гэтага мікрараёну, якія кажуць, што для іх гэтая будоўля сталася навіною, з імі ніхто не раіўся наконт гэтага будаўніцтва».

«Гэта рашэнне Мінгарвыканкама нумар 162 ад 20 студзеня 2017 года.. Замоўца будаўніцтва — таварыства з абмежаванай адказнасцю «Кіпрэканструкцыя», будуе таварыства з абмежаванай адказнасцю «Белрэканструкцыя», — распавядаў раней сакратар управы сойму КХП БНФ і сябра «Хрысціянскай злучнасці Курапаты» Алесь Чахольскі. — Найхутчэй гэта даччыныя фірмы. «Кіпрэканструкцыя» мае юрыдычны адрас на Ваўпшасава, 22а, пакой 22. Цікавае пытанне, як ТАА, якое мае пакойчык у офісным цэнтры ці яшчэ дзе, дазволілі будавацца на гэтым лапіку паміж кальцавой дарогай і дамамі па вуліцы Мірашнічэнкі 49, 51, 53?»