Беларусы гатовы даплочваць за беларускую мову на этыкетках тавараў

У интэрнце з'явілася петыцыя за падачу інфармацыі аб таварах і паслугах на абедзвюх дзяржаўных мовах Беларусі: беларускай і рускай. Петыцыю стварыў блогер Антон Матолька, ён кажа Свабодзе, што ідэя належыць каардынатару грамадскай ініцыятывы «Справаводства па-беларуску» Ігару Случаку.

Петыцыя мае быць накіраваная ў Адміністрацыю Лукашэнкі і Палату прадстаўнікоў.

У петыцыі гаворыцца, што цяпер у Беларусі дзейнічае закон «Аб абароне правоў спажыўцоў», паводле якога інфармацыя пра тавары і паслугі павінна даводзіцца да спажыўцоў па-беларуску або па-руску. Гэта значыць, абавязку даваць інфармацыю па-беларуску няма, і вытворцы ў асноўным ігнаруюць беларускую мову і правы беларускамоўных спажыўцоў.

Усе іншыя краіны Еўразійскага эканамічнага саюза ў сваім нацыянальным заканадаўстве маюць патрабаванне выкарыстоўваць пры інфармаванні пра тавары і паслугі дзяржаўную мову. У петыцыі прапануецца ўнесці адпаведныя змены ў беларускі закон: абавязаць вытворцаў даводзіць інфармацыю на абедзвюх дзяржаўных мовах.

Супраць беларускай мовы на этыкетках раней выказваўся намеснік міністра гандлю Эдвард Матуліс. Ён прыводзіў у прыклад звесткі з ААТ «Савушкин продукт» (бел. «Савушкаў прадукт»), паводле якіх пераклад этыкетак на беларускую падвысіць сабекошт прадукцыі.

Тым часам на сайце Talaka.by беларусы паспяхова сабралі 2071 рубель (каля 1000 еўра) на стварэнне ўпакоўкі на дзвюх дзяржаўных мовах. Мэтавай сумы дасягнулі за два дні, а да завяршэння збору грошай засталося яшчэ 58 дзён.