У Барысаве двух газавікоў абвінавацілі ў смерці шасці чалавек

У судзе Барысаўскага раёну 5 студзеня пачынаецца разгляд справы супраць двух слесараў «Барысаўгазу». Іх абвінавачваюць у прычыненні смерці праз неасцярожнасць — 27 студзеня 2016 году ад працёку газу загінулі 6 чалавек, у тым ліку непаўналетнія 10 і 17 год.

Жыхарка дому, дзе працёк газ, заяўляла "Радыё Свабода", што ёй шматкроць адмаўлялі ў дапамозе: «Санстанцыя, газавыя, тры разы хуткая, шэсць разоў ЖЭС — ніхто не прызнаваў, што газ».

Праз некалькі дзён пасля здарэння жанчына легла ў лякарню з атручэннем «невядомым рэчывам» (яна падазравала, што адбыўся працёк прыроднага газу, а газавікі казалі пра чадны газ). Але, як цяпер яна кажа Свабодзе, следства не прызнала яе пацярпелай — на суд яна пойдзе ў статусе сведкі.

У канцы 2016 году ў перадачы «Трэба разабрацца» на тэлеканале АНТ пра гэтае здарэнне згадваў старшыня Следчага камітэту Беларусі Ігар Наскевіч. Ён заявіў, што ў краіне адсутнічае адзіны дзяржаўны орган, адказны за газавую бяспеку грамадзянаў, таму камісіі па надзвычайных сітуацыях пры Савеце міністраў даручана распрацаваць дакументы па стварэнні дзяржаўнага газавага нагляду.