Адмовіцца ад размеркавання беларускім выпускнікам стала танней

7 снежня была прынятая пастанова Савета Міністраў №998, якая зацвердзіла новую рэдакцыю палажэння аб парадку пакрыцця ў бюджэт сродкаў, выдаткаваных дзяржавай на падрыхтоўку навуковага работніка вышэйшай кваліфікацыі, спецыяліста, рабочага, службоўца, піша Радыё Свабода.

Што змянілася?

З сумы, якую грамадзяне павінны кампенсаваць у бюджэт за навучанне, выключылі выдаткі на сацыяльную падтрымку (стыпендыі, дармовае харчаванне для асобных катэгорыяў навучэнцаў, выдаткі на ўтрыманне інтэрнатаў).

Напрыклад, у Беларускім дзяржаўным унівэрсітэце мінімальная стыпендыя для студэнтаў, якія навучаюцца на спецыяльнасцях гуманітарнага профілю, складае 72 рублі 83 капейкі. Усяго за 5 гадоў навучання студэнт атрымае прыблізна 4369 рублёў 8 капеек (2238 даляраў па курсе на 13 снежня 2016 года). Цяпер гэтую суму не трэба будзе вяртаць у выпадку адмовы ад размеркавання.

Разлік сумы выдаткаў на падрыхтоўку спецыяліста адбываецца, зыходзячы з суадносін аб'ёму вучэбных гадзін прафесійнага кампаненту да агульнага аб'ёму вучэбных гадзін на рэалізацыю адпаведнай адукацыйнай праграмы. Такім чынам, выніковая сума, якую выпускнік павінен будзе заплаціць у выніку адмовы ад размеркавання, будзе залежаць ад канкрэтнай навучальнай установы.

Дзякуючы зменам заканадаўства маладым спецыялістам стане танней адмовіцца ад адпрацоўкі прымусовага размеркавання.

Магчыма, гэтым крокам дзяржава спрабуе заахвоціць грамадзян добраахвотна вяртаць сродкі без адпрацоўкі размеркавання. Апошнія гады назіраецца хранічны недахоп заявак на маладых спецыялістаў. Таму дзяржава зацікаўленая вярнуць сродкі, што былі затрачаныя на падрыхтоўку незапатрабаваных спецыялістаў.