Вайцюшкевічу забаранілі дазволены раней канцэрт у Мінску

Следам за канцэртамі праектаў Сяргея Міхалка і "Народнага альбому" гастрольнае пасведчанне атрымалі арганізатары канцэрту Змітра Вайцюшкевіча і WZ-Orkiestra. Мерапрыемства планавалася правесці 8 студзеня ў мінскай канцэртнай зале «Атлант», нагадвае tuzin.fm. Рэкламная кампанія і продаж квіткоў пачаліся на мінулым тыдні. Сам выканаўца быў настроены аптымістычна і выказаў спадзеў, што гэтая адліга ўсур’ёз і надоўга. WZ-orkiestra рыхтавалі вялікую праграму, куды меліся ўвайсці найлепшыя песні Змітра – ад альбому «Цацачная крама» да «Каметы» – дыску, які быў прызнаны альбомам месяца на Tuzin.fm у лістападзе. 

Аднак 7 снежня продаж квіткоў быў спынены, а ў афішы з'явілася пазнака «Адмена». Арганізатар канцэрту Вячаслаў Гулевіч паведаміў, што ім было нечакана адмоўлена ў арэндзе пляцоўкі, нягледзячы на папярэднюю дамоўленасць і наяўнасць гастрольнага пасведчання. Як патлумачылі ў дырэкцыі КЗ "Атлант", у іх з'явіліся непераадольныя перашкоды – завод "Атлант" сыходзіць на зімовыя вакацыі, ажно да 16 студзеня 2017 года, таму абслужыць гэтае мерапрыемства ўяўляецца немагчымым. 

Ад 2010 года Зміцер Вайцюшкевіч пазбаўлены магчымасці легальна выступаць на Радзіме. Яго канцэрты па ўсёй Беларусі зрываюцца з розных прычынаў.

Нагадаем, журналіст і культуролаг Максім Жбанкоў нядаўна выказаў "ЕўраБеларусі" меркаванне, што атрымаць дазвол на канцэрт - яшчэ не значыць яго правесці, і што неаднаразова пасля дазволаў выступы "апальных" музыкаў нечакана забаранялі.