Сёння ў Мінск прыязджае прапагандыст Салаўёў, яго рыхтуюцца сустрэць акцыяй пратэсту

«Гэта не першы візіт расійскіх прапагандыстаў у Мінск. Паказальна, што людзі, якія заяўляюць, што Беларусь гэта не самастойная дзяржава, а частка Расіі ці «рускага міру», свабодна ездзяць па Беларусі і ладзяць свае прапагандысцкія шоу у лепшых залах», – такі тэкст зʼявіўся на старонцы «Маладога фронту» у «Facebookʼу».

У паведамленні таксама гаворыцца пра тое, што прадстаўнікам творчай беларускай эліты не даюць магчымасці выступаць увогуле, у той час, як «адзін з ідэолагаў расійскага шавінізму ладзіць свой выступ у вялікай зале Палаца Рэспублікі», піша Белсат.

«Мы мяркуем, што варта выйсці супраць выступу расійскага прапагандыста Салаўёва, каб засведчыць, што значная частка беларускага грамадства выступае супраць прапаганды вайны і нянавісці, якія мы цяпер чуем з вуснаў Крамля і расійскіх медыя. Таксама важна, каб расійскія імперцы не адчувалі сябе ў Беларусі як дома, але ведалі, што яны нязваныя госці на чужой зямлі», – тлумачыць сэнс акцыі маладафронтавец Сяргей Пальчэўскі.