На міжнародным кінафестывалі «Лістапад» у Мінску пакажуць фільмы «Белсату»

У праграме найбуйнейшага ў Беларусі кінафестывалю амаль 160 стужак, палова – конкурсныя: ёсць і тытулаваныя ўладальнікі прэстыжных прэміяў, і еўрапейскі арт-хаўс, і дзёрзкая маладая школа.

На «Лістападзе» пакажуць фільмы, знятыя для «Белсату»: «25» Андрэя Куцілы, «Друя» Іллі Бажко, «200 000 абаротаў» Кацярыны Маркавец, паведамляе тэлеканал.

Фільм «25» Андрэя Куцілы распавядае пра маладых людзей, народжаных у незалежнай Беларусі. Пра што яны мараць? Ці маюць амбіцыі? А можа ім хапае чаркі ды скваркі? Штодзённасць герояў фільму – гэта пульс жыцця маладой Беларусі.

Стужка «Друя» Іллі Бажко распавядае пра беларускае мястэчка, у якім найбольш захоплівае не яго гісторыя, не канкрэтныя даты і не імёны людзей, а атмасфера.

Стужка «200 000 абаротаў» Кацярыны Маркавец (Севасцянавай) расказвае пра напалову спаралізаванага Сашу Аўдзевіча, які адважыўся на авантуру – паехаць да Балтыйскага мора на ровары з ручным прывадам. Каб ажыццявіць сваю мару, Аляксандру трэба праехаць больш за 500 км, гэта значыць, зрабіць 200 000 абаротаў рукамі.

Летась найлепшым дакументальным фільмам у Нацыянальным конкурсе міжнароднага фестывалю «Лістапад» прызналі стужку «Госці», якую зняў адмыслова для «Белсату» рэжысёр Андрэй Куціла.

У асноўным конкурсе мастацкага кіно сёлета ёсць фільмы з Чэхіі, Польшчы, Румыніі, Францыі, Кыргызстану, а беларускіх стужак – няма.

На думку экспертаў, беларускае мастацкае кіно развіваецца, але стаць у шэраг з пераможцамі Канаў пакуль не гатовае.

«Гэта такі ўзровень вельмі высокі, гэта фільмы майстроў, якія прызнаныя ў свеце, і на жаль няма такіх беларускіх стужак, якія маглі б спаборнічаць з гэтымі фільмамі на роўных», – зазначае Мікалай Лаўрынюк, каардынатар нацыянальнага конкурсу фестывалю «Лістапад».

Але беларускае кіно імкліва расце, і ў нацыянальным конкурсе сёлета чакаецца гарачая барацьба. Адна з фаварытаў у мастацкай частцы – стужка «Душы мёртвыя» рэжысёра Віктара Красоўскага: знятая адным кадрам карціна распавядае пра завод, дзе працуюць інваліды, якіх наймаюць з прычыны падатковых ільготаў. Рэжысёр Віктар Красоўскі чакае беларускага гледача.

«Я думаю, кожны чалавек у Беларусі хоча глядзець добрае кіно, калі ён яшчэ даведаецца, што гэта беларускае кіно, ён будзе ўдвая больш рады», – кажа Віктар Красоўскі.