Прадстаўнікі Польшчы і Беларусі ўсклалі кветкі на магілу Тамаша Зана

У вёсцы Смаляны Аршанскага раёну Віцебскай вобласьці амбасадар Польшчы і прадстаўнікі мясцовых уладаў ушанавалі памяць паэта Тамаша Зана. Урачыстасць была прымеркаваная да 220 гадавіны народзінаў паэта, паведамляе Польскае радыё.

Амбасадар Польшчы Конрад Паўлік заявіў, што вельмі ўсцешаны тым, што беларусы захоўваюць памяць пра вядомага ў Польшчы паэта, сябра Адама Міцкевіча й Яна Чачота, заснавальніка таварыства філаматаў. Ён падзякаваў мясцовым уладам за тое, што даглядаюць магілу Тамаша Зана.

Дырэктар Нацыянальнага музею гісторыі Беларусі Сяргей Вечар, прысутны на цырымоніі, зазначыў, што веды пра паэта-рамантыка трэба пашыраць у Беларусі. Ён паведаміў, што міністэрства культуры разгледзіць пытанне ўшанавання памяці Тамаша Зана ў вёсцы Какоўчына (Кахачын), дзе знаходзіўся маёнтак Занаў.

Тамаш Зан (1796-1855) быў паэтам-рамантыкам, адным са стваральнікаў таварыства філаматаў. За ўдзел у антыцарскім вызвольным руху быў сасланы на Ўрал, дзе праводзіў геалагічныя даследаванні. Пасля сямігадовай ссылкі вярнуўся на Радзіму. Тамаш Зан першым з кола віленскіх паэтаў пачаў актыўна вывучаць беларускую народную творчасць.