На беларуска-польскай мяжы запрацаваў найсучаснейшы рэнтген для таварных цягнікоў

У польскім Тэрэспалі на беларускай мяжы распачаў працу найсучаснейшы ў Еўропе рэнтген для таварных цягнікоў, паведамляе "Польскае радыё".

«Чарговы сканэр у Тэрэспалі – гэта найбольшая й найсучаснейшая прылада для барацьбы з памежнай злачыннасцю, якая ёсць у наяўнасці польскай мытні. Гэта адзіная прылада такога тыпу, якая прасвечвае таварныя цягнікі на трох пуцях. Гэта дапаможа знаходзіць нелегальныя й небяспечныя тавары, але таксама тайнікі й дадатковыя канструкцыі таварных вагонаў і кантэйнэраў без іх адкрыцця», – паведамляюць у Міністэрстве фінансаў.

Дамова аб рэалізацыі інвэстыцыі была падпісаная ў верасні 2014 году, яе кошт склаў 5,5 млн даляраў.

У Міністэрстве фінансаў адзначаюць, што пра неабходнасць новага рэнтгену сведчаць лічбы. Цягам васьмі месяцаў бягучага году мытнікі з Люблінскага ваяводства перахапілі кантрабанду больш за мільён пачак цыгарэт, якія перавозіліся ў таварных вагонах і кантэйнэрах.