Ля мемарыяла ў Трасцянцы нарэшце паставілі шлагбаум (фота)

Грамадскія актывісты, якія праводзілі чарговую Акцыю памяці ахвяр камуністычны рэпрэсій у Благаўшчына (каля вёскі Трасцянец, Мінскі раён), прыемна здзівіліся, калі ўбачылі, што мясцовыя ўлады пачалі ўпарадкоўваць мемарыяльнае месца. Яшчэ ў жніўні па дарозе да крыжоў і помніка быў насыпаны агромністы вал, праз які было немагчыма перабрацца, а таксама ляжалі кучы смецця, навезенага машынамі, якія рэгулярна раз'язджалі па мемарыяле, піша "Новы час".

Цяпер жа ў Благаўшчыне ўсталявалі велізарны шлагбаум — машынам не праехаць, а сам вал прыбралі. 

Так было

Так стала

Як вынікае з ліста, адрасаванага старшынём адміністрацыі Заводскага раёна Мінска А. Дараховічам грамадскай актывістцы Ганне Шапуцьцы, нарэшце скончана эпапея і з пахаваннем рытуальна забітага барана, які ў жніўні быў знойдзены прама на мемарыяльным месцы. Па словах чыноўніка, барана, як і належыць паводле заканадаўства, пахавалі ў скотамагільніку, а супрацоўнікаў «Рэмаўтадора», якія спачатку проста засыпалі барана кучай пяска, пакаралі — знялі ад 10% да 50% прэміяльных, таксама рабочым зрабілі вымовы.

Ганна Шапуцька распавяла, што ў Благаўшчыне неабходна яшчэ шмат чаго ўпарадкоўваць, каб прывесці мемарыял у прыстойны выгляд, і выказала спадзяванне на дапамогу ў гэтым мясцовых уладаў.