У Мінску з'явіліся шыльды з гістарычнымі назвамі вуліцаў

Міністэрства культуры Беларусі падтрымала і ажыццявіла прапанову грамадзкага аб’яднання "Альтэрнатыва", якое ў 2015 годзе сабрала некалькі тысяч подпісаў за тое, каб зрабіць такія шыльды на 16 вуліцах, 2 праспектах і 2 плошчах у цэнтры Мінску.

На шыльдах, што вісяць на пачатку вуліцаў, сучасныя назвы дублююцца мадыфікаванай пад "школьны" правапіс беларускай лацінкай.

У ліку вуліцаў з шыльдамі:

— Герцэна (з 1922 г.), ранейшыя назвы: Малая Бернардынская (з XVII ст.), Малая Манастырская (з 1866 г.), Бернардынскі завулак (з 1920 г.);

— Зыбіцкая (з 2010 г.), ранейшыя назвы: Зыбіцкая (з XVI ст.), Балотная (з 1866 г.), Гандлёвая (з 1882 г.);

— Інтэрнацыянальная (з 1947 г.), ранейшыя назвы: Валоцкая (з XVII ст.), Хрышчэнская (з 1866 г.), Урыцкага (з 1919 г.), Кастрычніцкая (з 1922 г.);

— Кірылы і Мяфодзія (з 1990 г.), ранейшыя назвы: Вялікая Бернардынская (з XVII ст.), Манастырская (з 1866 г.), Бернардынская (з 1920 г.), Бакунінская (з 1922 г.);

— Музычны завулак (з сярэдзіны ХХ ст.), ранейшыя назвы: Манастырскі (з XVIII ст.), Музыканцкі (з сярэдзіны XIX ст.);

— Энгельса (з 1922 г.), ранейшыя назвы: Дамініканская (з XVII ст.), Петрапаўлаўская (з 1866 г.), Валадарскага (з 1919 г.), паведамляе "Радыё Свабода" .