У Мінску адкрылі помнік Манюшку і Дуніну-Марцінкевічу (фота)

Скульптурная кампазіцыя размясцілася ў скверы каля ратушы на пл. Свабоды.

"З усіх дзеячаў культуры дасавецкага перыяду, чыё жыццё і творчасць цесна звязаны з Мінскам, няма, мабыць, ніводнага, хто мог бы супернічаць з Манюшкам у маштабе талентў і вядомасці ў свеце. Яго супрацоўніцтва з выбітным драматургам Дуніным-Марцінкевічам паклала пачатак развіццю беларускага опернага мастацтва", - цытуе БЕЛТА намесніка старшыні Мінгарвыканкама Ігара Карпенку.

У сярэдзіне XIX стагоддзя на месцы гатэлю "Еўропа" знаходзіўся мінскі гарадскі тэатр, тут адбылася прэм'ера знакамітай беларускай оперы "Ідылія". Асаблівая гістарычная каштоўнасць гэтага месца і ў тым, што недалёка ад пл. Свабоды размешчаны дом, у якім жыў Станіслаў Манюшка з сям'ёй (Энгельса, 3). А ў будынку гарадской ратушы знаходзілася музычная школа, якую ён наведваў.

Аўтары скульптуры - Леў і Сяргей Гумілеўскія. Іх творчае прапанова была абрана па выніках конкурсу на стварэнне скульптурнай кампазіцыі, тэма якой "Жыхары Мінска XIX стагоддзя: кампазітар Станіслаў Манюшка і драматург Вінцэнт Дунін-Марцінкевіч - стваральнікі беларускай нацыянальнай класічнай оперы".