Алексіевіч атрымае тры кітайскія прэміі

Алексіевіч, якая сёння прыбыла ў Кітай, стане госцяй двух кніжных кірмашоў, дзе будуць прэзентавацца пераклады яе кніг на кітайскую мову.

У насычанай праграме дзесяцідзённага побыту беларускай пісьменніцы ў Кітаі прадугледжаныя ўручэнне трох кітайскіх прэмій, сустрэчы з кітайскімі пісьменнікамі і крытыкамі, інтэрв'ю для тэлебачання і прэсы.

У прыватнасці, Алексіевіч атрымае прэмію Шанхайскага кніжнага кірмашу, прэмію Пекінскага кніжнага кірмашу і прэмію Вэньцзінь, якая лічыцца найважнейшай літаратурнай узнагародай Кітаю.

20 жніўня запланаваная сустрэча Алексіевіч з кітайскім пісьменнікам Мо Янем, лаўрэатам Нобелеўскай прэміі 2012 году.

26 і 27 жніўня пісьменніца з Беларусі сустрэнецца з міжнародна прызнанымі кітайскімі пісьменнікамі Янь Лянькэ, Юй Хуа і Лян Хун, паведамляе "Радыё Свабода".