У Маскве выдадуць падручнік "Беларуская мова для замежнікаў"

Кніга з-за асаблівасцяў расійскага заканадаўства будзе ўтрымліваць ўзроставы цэнз 16+.

Дапаможнік рыхтуе беларускі лінгвіст Антон Сомін, які вядомы па заснаванні ў Мінску фестывалю моваў пры БДУ. "Праграма падручніка разлічана на 16 заняткаў па розных тэмах: ад святаў да спорту. Пасля ёсць лексічная частка, і гэта будзе адзіны, на колькі мне вядома, падручнік беларускай мовы, дзе разглядаецца афіцыйная і класічная норма. То бок там праз слэш напісана, напрыклад, веласіпед і ровар, ці пасольства і амбасада. Для таго, каб кожны мог абраць той варыянт беларускай мовы, які хоча вывучыць. Таксама ёсць граматычныя практыкаванні, каб была грамтыка", - адзначыў ён

Акрамя таго, Сомін разам з сябрамі запісвае аўдыёверсію дыялогаў, каб мову можна было пачуць.

Падручнік "Беларуская мова для замежнікаў" павінен выйсці ў верасні гэтага года. Выданне будзе ўтрымліваць шэраг ілюстрацый і аўдыёдадаткаў. Аўдыёверсію беларускі лінгвіст рыхтуе за ўласныя сродкі і на хатнім абсталяванні, паведамляе "Радыё Рацыя".